fl. 1. Pir -pir ovoz chiqarib, tez qanot qoqmoq yoki aylanmoq.
Pirildoq pirillab aylanmoqda.
Qush ham itga tutqich bermay, yana pirillab uchdi. — H. Nazir, Soʻnmas chaqmoqlar
Tolibjon ventilyator vilkasini rozetkaga tiqishi bilan, urchuq pirillab aylana ketdi. — S. Ahmad, Jimjitlik
2. Titragannamo harakat qilmoq, hilpiramoq.
Shamol stol ustidagi daftar, kitoblarning sahifalarini shitirlatib varaqladi, deraza pardasi betoʻxtov pirillay boshladi. — F. Musajonov, Daradagi qishloqda
Mayin yel shivirlab, boshingdan essa, Roʻmoling pirillab oʻynab ketadi. — Uygʻun.
3. Pirpiramoq, uchmoq (masalan, kiprik, mushak haqida).
Cholning koʻzlari asabiy pirilladi, turib, asta uyga kirdi. — H. Ahmar, Kim haq?
Salimboyvachchaning koʻzlari ola-kula boʻlib, yuzidagi goʻshtlari pirilladi, Bu qanday gap? — Oybek, Tanlangan asarlar
Uning [kampirning] etsiz lablari asabiy pirillar, peshonabogʻi yelkasiga osilib tushgan, qaqshoq oyoqlari yalang edi. — N. Qilichev, Chigʻiriq
4. Mayda qadam tashlab, tez yurmoq; pildiramoq.
Bobomirzo yelkasida sochiq, oldida fartuk, doʻppisini yarimta qilib, pirillab yuribdi. — I. Rahim, Taqdir