Қидирув

от 1. Парранданинг дум ва қанотларини ташкил қилган, мугузсимон узун найчанинг икки ёнида икки қатор бўлиб ўсиб чиқадиган парлардан иборат аъзоси.

Товуқ пати.

Саид Амин сўйилган ўнтача беданани олдига уйиб қўйиб, патларини юлмоқда. — М. Исмоилий, Фарғона тонг отгунча.

Товус патидан ясалган елпиғичи билан чиройли юзини елпиб-елпиб қўяди. — Х. Тўхтабоев, Ширин қовунлар мамлакати

2. Мато, гилам ва шу кабиларнинг юзини қоплаган сунъий тук.

Уй ўртасидаги сандал устида исқирт кўрпа, ерда пати тўзиб кетган эски гилам, кичик бир шолча тўшалган. — Н. Сафаров, Оловли излар

Чўққи соқол, бошига пати тўзиб кетган сурмаранг духоба дўппи кийган, кўзойнакли, олтмиш ёшлардаги чол велосипед миниб келиб қолди. — С. Аҳмад, Чўл бургути

от 1. Оёқ кийими ичига қалин ва юмшоқ мато (масалан, кигиз)дан қирқиб солинадиган тўшама.

Кавушим патагин қалин сол, Оёғимни қабартмасин. — Фолклор

2. сфт. Чигиллашиб, бир-бирига ёпишиб кетган (соч, соқол, юнг кабилар ҳақида).

Ўнг қўлини аста узатиб, унинг патак сочларини силади. — А. Мухтор, Туғилиш

Қирқ ёшлардаги патак соқол, суяги бузуқ, бадбашара киши кирди. — С. Сиёев, Ёруғлик

от Кўпинча ёғ аралаштирилган, оширилмаган хамирдан чекичлаб тайёрланадиган юпқароқ нон. Шўрвага патир тўғрамоқ.

[Жондор] Хамири нуқул қаймоққа қорилиб, оғизда эриб кетувчи оппоқ патир нонларни ушатиб ташлади. — Ойбек, Танланган асарлар

У [Паҳлавон] ёш шоирнинг ғамини еб, патир нон, қатлама, шарбат олиб келган эди. — М. Осим, Карвон ёʻлларида

сфт. 1. Пат билан қопланган, пати бор.

Кўркам патли қуш.

2. Сунъий тук билан қопланган, тукли.

Патли мовут.

Паст бўйли, янги брезент этик, галифе шим, гимнастёрка кийган бир киши таклифни кутмай, патли гиламдан дадил келиб, қўлтиғидаги қора чарм папкасини стол четига қўйди. — С. Нуров, Нарвон

Маликахон ҳеч нарса демади, лабини истиғно билан буриб, пахтасини хирмонга бўшатди, кейин юзи патли, сариқ шиппагини ечиб, қоқди. — Н. Аминов, Қаҳқаҳа

от 1. с. т. Билет; чек; талон.

Поезд паттаси. Бозор паттаси.

Борса, дугонаси келмаган экан. Патта олиб, кино бошланар пайтигача уни бетоқат кутди. — Н. Қиличев. Чиғириқ.

Ота, Ҳеч бўлмаса шу зиёлинамо одам патта йиртиб олади, деб ўйлаган эди. Ёʻқ, у ёʻлкира ҳам тўламай, зинага оёқ қўйиб тураверди. — С. Нуров, Нарвон

2. Гувоҳнома, ҳужжат.

— Куёвинг Мамуржон билан загснинг никоҳ паттасини оласизлар, — деди Мамасаид. — П. Турсун, Ўқитувчи

от 1. Ихтирочига Давлат патент идораси томонидан бериладиган, унинг ўз ихтиросига муаллифлиги ва мутлақ ҳуқуқини тасдиқловчи ҳужжат.

Амиридин деган препарати учун АҚШ, Буюк Британия, Швейсарияда патент олинди. — Фан ва турмуш

Таниқли ботаник олим Қаҳҳор Ҳожиматов бошчилигида ушбу шифобахш воситани яратган тадқиқотчилар эса Давлат патент идорасидан патент олишди. — Фан ва турмуш

Маъданларни қайта ишлашга оид ишлаб чиқилган технологияларга патентлар олинди. — Газетадан

2. Савдо-сотиқ ёки бирор касб-ҳунар билан шуғулланиш учун рухсат берилганлиги ҳақидаги ҳужжат.

Илгариги катта дўконини ёпиб, патентини топширди. — А. Қаҳҳор, Сароб

Ҳожатбарорликда қадамлари ростланиб, хусусий меҳнат фаолиятини юргизиш учун патент олди. — Газетадан

Ўша вақтлари патент олиб, ўзимнинг шахсий Москвичимда киракашлик қилар эдим. — Газетадан