ot 1. Ovqat boʻladigan mahsulot, ov-qatli don-dun; yemish.
Oziq mahsuloti. Bir kunlik yoʻlga chiqsang, bir haftalik oziq ol! — Maqol
Yozning yozigʻi — qishning ozigʻi. — Maqol
Yigitlardan biri dasturxon yozib, yoʻlga olgan oziqlarini oʻrtaga qoʻydi. — A. Qahhor, Maston
Nima, oziq bittami, qozon osmadingiz! — Oybek, Tanlangan asarlar
2. Hayvonlar ovqati, yem-xashak.
Hayvonlar uchun qishga oziq tayyorlamoq. Qurtlarga oziq bermoq.
3. Oʻsimliklar oʻsish jarayonida yerdan oladigan moddalar.
Oʻsimliklarga qoʻshimcha oziq berish. Ildiz oziq bersa, novda koʻkarar. — Maqol
- Jon ozigʻi yoki jonga oziq Rohat. Yaxshi soʻz — jon ozigʻi, yomon soʻz — bosh qozigʻi. — MaqolMayin esgan nasimi, ob-u havosi, Boʻlur jonga oziq zavq-u safosi. — Habibiy
- Maʼnaviy (yoki ruhiy) Oziq Kishiga maʼnaviy zavq bagʻishlaydigan, uning maʼnaviy jihatdan oʻsishiga, takomillashuviga xizmat qiladigan vosita. Goʻzal adabiyot — ruhiy oziq. — A. Qahhor, Sarob
- Oziq tish Kishi va hayvonlarning ovqat chaynash, ezish uchun xizmat qiladigan tishi; jagʻ tishlari.