Qidiruv

ot 1. Yuridik yoki jismoniy shaxsning nomi toʻliq yozilgan matnning (matn va rasmning) qavariq yoki botiq tasviri boʻlgan bosma shakl (asbob) (Qogʻoz, surgich, mum va boshqalar materiallarga nusxa tushirish uchun xizmat qiladi).

Mana, noma tayyor. Faqat muhringizni bossangiz bas. Uygʻun va I. — Sulton, Alisher Navoiy

— Mulla Sharofiddinning muhri bor bu vasiqalarda. Mullajon qozining muhri bor! — dedi [kampir] vasiqalarni titkilab. — A.Qahhor, Qoʻshchinor chiroqlari

2. Tamgʻa; gerb.

Bir yerda uchta pul yotipti: ikkitasi siyqa-siyqa boʻlib ketgan, bittasining muhri yoʻq. — Ertaklar

ot Bolta, tesha, ketmon kabi asboblarning tigʻga qarama-qarshi tomoni, orqa qismi.

Onda-sonda uchragan katta kesaklarni ketmonning muhrasi bilan bir ur-da, ketaver! — A.Qodiriy, Obid ketmon

Alanglab oʻrnimdan turishim bilan domlaning qoʻlidagi teskari ushlangan boltaning muhrasi yelkamga kelib tushdi. — Gʻ. Gʻulom, Shum bola

sft. Muhr bosilgan; tamgʻali.

U [Sultonmurod] qoʻlida bir parcha muhrli qogʻoz bilan xushnud boʻlib chiqdi. — Sh. Toshmatov, Erk qushi

ot tar. Xon, amirlar saroyida muhr saqlovchi amaldor.

Maktubni xon otaliqqa, otaliq muhrdorga beradi. — U. Ismoiliy, Saylanma

ot tar. Muhr bosuvchi amaldorga beriladigan pul, muhr haqi.

Sotuvchi va oluvchi oʻzaro kelishganlaridan keyin qozixonaga borib, vasiqa qilib, qozikalonga tegishli muhronani berib, muhr bostirganlar. — S. Ayniy, Esdaliklar

fl. 1. Muhr bosmoq, muhr bilan tasdiqlamoq.

Tursunali Isroilovga ertasigayoq bosh inspektor-revizor degan lavozim muhrlab berildi. — Mushtum

2. Foydalanish, ochishni taqiqlovchi belgi (muhr) qoʻymoq.

Boʻldi, ishimiz tamom, muhrlang xonani, lozim boʻlsa, yana ocharmiz. — Oybek, Nur qidirib

3. koʻchma Oʻlmas, yoʻq boʻlmas qilib olmoq.

Har bir koʻrgan narsasini koʻngliga muhrlab olmoqchi boʻlgandek sinchiklab kuzatardi. — Shuhrat, Shinelli yillar