Қидирув

от 1. Нарсаларнинг маза-таъм билиш аъзолари орқали сезиладиган хусусияти; маза, таъм.

Овқатнинг лаззати. Анжирнинг лаззати.

2. кўчма Ҳузур-ҳаловат ҳисси; маза, нашъа, завқ.

Меҳнат лаззати. Дунё лаззатлари. Уйқу лаззати. Осон ишда лаззат бўлмайди.

Соҳилларни айланиб, Ўтирамиз оқшомлар. Кеч лаззатига қониб, Роҳатланади танлар. — Т. Тўла

Аҳмад кўзини юмди. Бутун вужуди бўйлаб лаззат таралгандек бўлди. — Ф. Мусажонов, Ҳиммат

3. Лаззат (хотин-қизлар исми).

сфт. 1. Мазаси (таъми) жуда яхши; ширин, тотли.

Лаззатли шўрва. Лаззатли мева.

Меҳмонлар лаззатли овқатларни хўп ейишди, ичишди. — П. Турсун, Ўқитувчи

2. кўчма Ҳузур-ҳаловат бағишлайдиган; ҳузурли, нашъали, завқли.

Лаззатли ҳаёт. Лаззатли суҳбат. Лаззатли онлар.

Бу дақиқалар унга ҳам лаззатли, ҳам азобли туюларди. — Ў. Ҳошимов, Қалбингга қулоқ сол

сфт. 1. Бемаза, таъмсиз.

Лаззациз овқат.

2. кўчма Ҳузур-ҳаловациз, завқсиз.

Лаззациз турмуш.

фл. Лаззат олмоқ, лаззат ҳиссини туймоқ.

Комилнинг бундай парвосиз ўтиришини, бунинг устига, шеър ўқиб лаззатланаётганини кўрган Бўронбекнинг оғзи очилиб қолди. — Ҳ. Ғулом, Машъал

фл. Лаззатланмоқ феълининг орттирма нисбати.