Қидирув

сфт. 1. Узоқ яшаб катта ёшга етган, умрининг охирги босқичини яшаётган; қари.

Кекса одам. Кекса аёл. Кекса чинор.

Қуёш энди тиғ ёя бошлаган салқин сабоҳда Қорабулоқ қишлоғидан бири кекса, бири ёш — икки отлиқ чиқиб келаверди. — М. Исмоилий, Фарғона тонг отгунча.

Ана, кекса қайрағоч, унинг тунука том устига энгашган азамат шохи қуриб қолибди. — С. Аҳмад, Қадрдон далалар

2. от Кекса ёшдаги шахс; қария.

Кексалар чойхонаси. Кексалар ўгити.

Кексалар бўлса, бундай иссиқ ўттиз йил бурун бўлганини, ўшанда ҳам шаҳар товадай қизиб, одамлар атроф чорбоғларда жон сақлашганини эслашарди. — Мирмуҳсин, Умид

Кексаларнинг айтишича, бундай пайтларда бирон-бир тепаликнинг устига чиқиб, жимгина қулоқ солиб ёцангиз, ернинг нафасини эшитармишсиз. — Ў. Ҳошимов, Қалбингга қулоқ сол

3. кўчма Узоқ йиллардан бери мавжуд, кўп йилларни кўрган; қадимий, эски.

Кекса билим даргоҳларидан бири.

Ҳар бир халқнинг оғзаки бадиий ижодиёти у халқнинг тарихи қадар кексадир. — ЎТА

Эй, кекса булоқлар, эски қадрдон, Ўйноқи умримдай жўшиб оқдингиз. — Ғайратий

Шундай ёрқин, шундай ойдин замони ҳам бўлармикин бу жафокаш кекса дунёнинг?! — М. Исмоилий, Фарғона тонг отгунча.

от Умрнинг етукликдан сўнгги, организм фаолияти аста-секин заифлаша борадиган даври; кишининг шу даврга, ёшга хос ҳолати; қарилик.

Кексалик даври. Кексалик аломатлари.

Юзини кексаликдан кўра кўпроқ кўргиликлар ғижимлаб ташлаган бу чол билан у ўтган йил баҳорда танишган эди. — А. Қаҳҳор, Томошабоғ

Сал қўполроқ, кексаликка ёʻл тутган Қодиров, нима қилишини ва нима дейишини билмай, ўнғайсизланиб, ўрнидан турди. — И. Раҳим, Тақдир

фл. Кексалик даврига ўтмоқ; қаримоқ.

Дунё можаросидан қўл ювмоқчи бўлган бир отага кексайган кунларида фарзанд доғини кўрмасликнинг ўзи ҳам улуғ мукофотдир! — А. Қодирий, Ўтган кунлар

Бахтни ҳалол меҳнат билан топган одам., кексайганда ҳам ҳаёт лаззатини беминнат татийди. — Газетадан

фл. Кексаймоқ феълининг орттирма нисбати.