Поиск

ot (asosan koʻpl. shaklida) Kishining ruhiy holatiga taʼsir qiladigan his-tuygʻular, oʻy-xayollar.

Yoqimli kechinmalar. Qaygʻuli kechinmalar.

Gulnor koʻrkam sochlarini tuzatib chiroyli tush kabi yengil va totli kechinmalarga, oʻylarga berilib oʻtirdi. — Oybek, Tanlangan asarlar

ot 1. Afv etish; uzr.

U erining yuziga kechirim soʻragandek tikildi. — Sh. Rashidov, Boʻrondan kuchli

Qobil Komilovich asta qayrilar ekan, ukasining kechirim soʻrayotganday, muloyim tikilishini koʻrdi-yu, dili yorishdi. — J. Abdullaxonov, Xonadon

2. huq. Afv etishning xususiy shakli; davlat boshligʻi tomonidan jinoiy jazoning bekor qilinishi yoki yumshatilishidan iborat xususiy afv.

Kechirim yakka tartibda muayyan shaxsga nisbatan qoʻllanadi. — OʻzME

fl. 1. Kerakli yoki belgilangan vaqtdan keyin kelmoq, keyin bormoq; kech qolmoq.

Ishga kechikmadingizmi?

U hozir xotinining nega buncha kechikdingiz, degan soʻrogʻini kutar |edi]. — A. Qahhor, Qanotsiz chittak

Sevikli kuyovini yoʻlakda koʻrgan Oftob oyim kechikkani uchun nechogʻliq tashvishlar tortib va qandogʻ tushlar koʻrganini [Otabekka] labi-labiga tegmay soʻzlay ketdi. — A. Qodiriy, Oʻtgan kunlar

2. Belgili muddatdan keyinga qolmoq, oʻz vaqtida bajarilmaslik.

Taʼmir ishlari bu yil bir oz kechikdi.

Kechikib ekilgan gʻalla ham, chigit ham, Matqovulning keyin bergan ishlovlariga qaramay, yaxshi unum qilmadi. — M. Ismoiliy, Fargʻona tong otguncha.

3. s.t. kam qoʻll. Kech boʻlmoq, kech kirmoq.

-Beda oʻrib qoʻyish kerak edi-ku, — boshini qashidi Yormat. — A, kun ham kechikib qolibdi. — Oybek, Tanlangan asarlar

fl. Kechmoq feʼlining majhul nisbati.

fl. 1. Kechmoq feʼlining orttirma nisbati.

Suv kechirmoq. Xayolidan kechirmoq.

2. Afv etmoq, gunoh, xato va shu kabilarni oʻtmoq.

Yaxshi yozolmaganingni kechirish mumkin, lekin yaxshi yozishni istamaganingni kechirish mumkin emas. — Gazetadan

sft. 1. Kechirish mumkin boʻlgan, kechirsa boʻladigan.

Odiljonning boshqa har qanday xatti-harakati kechirimli, uzrli edi. Biroq bu nayrangi tutadigan tutumga toʻgʻri kelmasdi. — Yoshlik

2. Kechiradigan xususiyatga ega; kechiruvchi.

Oʻzbek xalqi juda kechirimli xalq.