Qidiruv

ot 1. Rus davlatida 15—17-asrlarda krepostnoy dehqon va shahar kambagʻallari orasidan Don, Yoyiq (Ural), Zaporojye kabi chekka joylarga qochib borgan erkin kishi, rus qozogʻi.

Zaporojye kazaklari.

2. Chor Rossiyasida 18-asrdan boshlab yerdan imtiyozli foydalanish evaziga harbiy xizmatni ado etishga majbur boʻlgan, Kuban, Orenburg, Don, shuningdek, askar olinadigan boshqa hududlarda yashovchi harbiy tabaqa vakili va shu tabaqa vakillaridan iborat qoʻshinlardagi askar.

Baland boʻyli, paxmoq sochli, dov kazak askarlar xalqni urib, niqtab, orqaga surishga tirishdi. — Oybek, Tanlangan asarlar

Peshinga borib xalq zoʻrlik qildi. Kazak askarlari safi siyraklashdi. — S. Siyoyev, Avaz

3. Sobiq Ittifoqdagi ayrim (ilgari askar olinadigan) hududlarning tub aholisiga mansub kishi.

ot 1. Harbiy qism joylashtiriladigan maxsus bino.

Bularning [Kavkaz otliqlarining] kazarmalari amir turadigan joylarning har biriga yaqinroq yerlarda bino qilingan edi. — S. Ayniy, Esdaliklar

Dam olishga komanda berilgach, kazarma besh daqiqa olagʻovur boʻlib turdi-yu, keyin birdan tinchib qoldi — jangchilarning hammasi oʻz oʻrniga yotdi. — H. Olimjonov, Taqdir taqozosi

2. Chor Rossiyasida, hozirgi ayrim xorijiy mamlakatlarda ishchilarning fabrika va korxona qoshidagi umumiy yotoqxonasi.

— Hozir shahardan anchagina uzoq bir yerda kazarmalar quryapmiz, — deb yozgan edi xatida Ergash. — H. Gʻulom, Toshkentliklar