Qidiruv

sft. 1. Organizm meʼyoriy holatini, faoliyatini buzuvchi narsa; kasallik, dard.

Sil kasali. Rak kasali. Tutqanoq kasali. Kasalga chalinmoq.

[Shokir ota:] Burungi zamonlarda Ibn Sino, Luqmon Hakim oʻtgan. Ular har bir kasalga davo topgan. — Oybek, Tanlangan asarlar

Onasi oʻzining kasalini ham unutib, uning boshida parvona boʻldi. — Oʻ. Hoshimov, Qalbingga quloq sol

Yosh boʻlganidan kasalini oʻzi sezmasa kerak. Kasali oʻqtin-oʻqtin bir koʻrinish berib qoʻyadi. — Oybek, Tanlangan asarlar

2. sft. Organizmining meʼyoriy holati, faoliyati buzilgan, kasallikka yoʻliqqan; betob.

Kasal odam. Kasal mol.

Xotirjam ishlasin, deb kasal onasini birovning qoʻliga tashlagim kelmadi. — S. Zunnunova, Olov

Odam organizmining kasal yoki shikastlangan aʼzolarini almashtirish uchun sunʼiy ehtiyot qismlar yaratish gʻoyasi yangilik emas. — Fan va turmush

3. Organizmining meʼyoriy holati, faoliyati buzilgan shaxs, kasallikka yoʻliqqan shaxs; bemor.

[Shokir ota:] Ibn Sinoga kasalning joni chiqmagan boʻlsa, bas ekan, tuzatar ekan. — Oybek, Tanlangan asarlar

Ikki qavatli maktab binosi shoshilinch suratda front yoqasidan keltirilgan yarador, kasallar uchun boʻshatilmoqda. — R. Fayziy, Sen yetim emassan

4. ot koʻchma Narsa yoki uning qismidagi nosogʻ, buzuq holat; nosozlik, illat.

Hamma kasal shundaki, siz xalq kuchiga ishonmaysiz. — Sh. Rashidov, Boʻrondan kuchli

U [Erkin] mashinaga bir qarashdayoq kasalini topadi va davosini qiladi. — H. Gʻulom, Toshkentliklar

5. ot koʻchma Odatga aylangan ish, xatti-harakat.

— Saʼvani yaxshi koʻrasizmi? — Otadan qolgan kasal bu, — kulib javob berdi Yoʻldoshev. — Yoshlik

Demak, yolgʻonchilik kasaliga mubtalo boʻlgan kishini rostgoʻy odamning qoni bilan davolasa boʻladi. — X. Toʻxtaboyev, Shirin qovunlar mamlakati

Erining toʻsatdan qaysarlik kasali tutdi. — Tafakkur

6. ot koʻchma Umuman, biror narsa istagi, shunga ishtiyoq, intilish; dard.

Oʻzing ayt, agar menga shu kasalingni bir ogʻiz bildirsang, men qaynatangga xat yozmasmi edim — A. Qodiriy, Oʻtgan kunlar

Oilada ishning juda ishkali — Xolposhshaning kiyim-kechak kasali. — Mushtum

ot 1. ayn. Kasal 1.

Zotiljam kasalligi. Yuqumli kasallik.

Samarqandda Boburni tildan qoldirgan kasallik — gʻoyat kuchli bir ruhiy larzaning oqibati edi. — P. Qodirov, Yulduzli tunlar

Avvaldan uning atrofida har xil kasalliklar: ter-lama, qora bezgak koʻpayib, aholining tinkasini quritgan edi. — K. Yashin, Hamza

2. Organizm meʼyoriy faoliyatining, salomatlikning buzilishi; kasal holat, dard, xastalik.

Shuncha xorlik va xoʻrlik yetmaganday otasi ogʻir kasallikdan vafot etdi. — M. Ismoiliy, Fargʻona tong otguncha.

sft. Tez-tez kasal boʻlib turadigan; dardchil.

Azaldan kasalmand Bashorat xola erining oʻlimidan keyin yana ham qiynalib qoldi. — N. Safarov, Uzoqni koʻzlagan qiz

— Pochcham ellikdan oshgan, novcha, kasalmand, rangpar, — deydi Musavoy. — Oybek, Bolalik

Kasalga oʻxshab koʻrinadigan.

Oʻrta boʻyli, toʻla, lekin keng yuzining goʻshtlari sargʻayib solqib tushgan, ellik sakkiz yoshlarda boʻlgan kasalnamo xotin asta-asta yurib kelaverdi. — Oybek, Tanlangan asarlar

ot Kasallarni muntazam kuzatish va davolash uchun joylashtiriladigan muassasa; shifoxona.

Mastura Aliyeva sakkiz oydan beri palatasidan chiqmay yotgan ogʻir xasta, uni kasalxonada hamma bilar, koʻp kishi kirib koʻrgan ekan. — A. Qahhor, Ming bir jon

fl. Biror kasal bilan ogʻrimoq, kasalga chalinmoq.

Mutribning kasallanib, Pitnakdan qaytib kelganini Avaz Roʻzimboydan eshitdi. — S. Siyoyev, Avaz

Ammo bu orada qora toʻqlisi kasallanib, vaqtincha Toʻngiz qoyani unutdi. — N. Norqobilov, Bekatdagi oq uycha