Изоҳли луғат
· яна 7 та луғатда
от 1. Ердан юқорига қараганда гумбаз, қубба шаклида бўлиб кўринадиган фазо бўшлиғи, осмон гумбази; осмон, кўк.
Яна чақмоқ чақди, яна фалак гумбурлади. — Ҳ. Ғулом, Замин юлдузлари
Чингизхон от солиб келиб, Минори Калон тагида фалакка бўй чўзган бу обидага маҳлиё бўлиб қолибди. — Мирмуҳсин, Меъмор
2. кўчма Тақдир, қисмат, кўргилик.
Мен ўзим бу фалакнинг дастидан нажот излайман, бегим. — П. Қодиров, Юлдузли тунлар
Эй фалак, чархинг бузилсин, Кимларга хор этдинг мени. — Э. Усмонов, Ёлқин
- Осмони фалак 1. Жуда баланд, юксак. — Сиз билан тўхтовсиз қилинган маишатлар мени аввал осмони фалакка олиб чиқиб, кейин жарга улоқтирди, — деди Олим Эргашга. — Б. Раҳмонов, Қилмиш-қидирмишШу баробар олдинда чанг-тўзонни осмони фалакка чиқариб гирдоб кўтарилди. — М. Мансуров, ЁмбиНоғоралар гумбури ва карнайлар садоси яна осмони фалакка чиқди. — О. Ёқубов, Кўҳна дунё
- Фалакнинг гардиши билан Фавқулодда ҳолларда, ғайриихтиёрий равишда, вазият талаби, бирор мажбурият орқасида; тақдир тақозоси билан. Бу ғариб ва кимсасиз киши асли Сабзавор шаҳридан, фалакнинг гардиши билан Ҳиротга келиб қолган. — Мирмуҳсин, МеъморФалакнинг гардиши билан шу қишлоққа куёв бўлиб келди. — Муштум
- Парвойи фалак Юз бераётган воқеа ва ҳодисаларга бефарқ қаровчи; парво қилмайдиган, беғам. Ғўзаларингиз чанқаб кетибди сиз бўлсангиз парвойи фалаксиз. — Ж. Абдуллахонов, Тонг ёришган соҳилдаЮвош эса парвойи фалак; ҳеч нарса билан иши ёʻқ, доим хурсанд. — Э. Райимов, Ажаб қишлоқ
- Фиғони фалакка чиқмоқ (ёки ўрмаламоқ, кўтарилмоқ) Ҳаддан ташқари жаҳли чиқмоқ, асабийлашмоқ, бўғилмоқ. Хайри боғчадан ўғлини олгани кирганда, тарбиячининг фиғони фалакка чиқиб турган эди. — С. Аҳмад, Қадрдон далалар— Падарига минг лаънат, шу ҳам кўп бўлдими, — саксон ёшлар атрофидаги ота-хоннинг фиғони фалакка ўрмалади. — Муштум