Поиск

ot 1. Tabiiy hodisalar (zilzila, shtorm, dovul, shamol)ning kuchini oʻlchash uchun qabul qilingan oʻlchov birligi.

Zilzilaning kuchi sakkiz balldan oshdi.

2. Oʻquvchilar, talabalar, sportchilar va shu kabilarga beriladigan, raqam bilan ifodalanadigan baho.

— Menga bir ball qoʻshadigan boʻldingiz, domla, — biletni olgach, uni dotsentga koʻrsatdi. — A. Obidjon, Akang qaragʻay Gulmat

— Eng yuqori ballni sizning qizingiz oldi, — deyishib ketma-ket Chinoriy bilan xotinini qutlay boshladilar. — X. Toʻxtaboyev, Shirin qovunlar mamlakati

1. Maʼqullash, tasdiqlash, maqtov, tahsin maʼnolarini ifodalaydi.

[Joyni] Oʻsha ochlik yillari solganmiz. — Balli. — A. Qodiriy, Oʻtgan kunlar

-Balli, ona qizim, — dedi Melivoy aka zavqlanib. — S. Ahmad, Ufq

Izzatulla aka bolaning boshini chipor shapkachasi ustidan silarkan: Balli deb qoʻydi. — Gazetadan

Uning fikrini maʼqullovchi ovozlar eshitildi: — Balli! Otangizga rahmat. — P. Tursun, Oʻqituvchi

2. Choʻzib talaffuz qilinganida, norozilik, kesatiq maʼnolarini ifodalaydi.

— Koʻchada sen bilan yetaklashib yuradigan xotinga balli-yey! — dedi Zumrad. — S. Siyoyev, Otliq ayol

3. Muayyan ball kuchiga ega boʻlgan.

Besh balli zilzila. Toʻqqiz balli dovul.

Kunduzi olti balli zilzila, imoratlarning qisir-qisiri vahimani kuchaytirdi. — Mirmuhsin, Umid

4. Raqamlar sistemasi bilan ifodalangan.

Besh balli sistema.

ot 1. Harakatlanuvchi transportning (mototsikl, mashina, traktor va boshqalar) havo damlanadigan rezina gʻildiragi.

seyalkadan tortib ekskavatorgacha, buldozerdan tortib mashina ballonigacha uning qoʻlida. — S. Ahmad, Jimjitlik

Undan narida, tomiga sandal kursi, mashina balloni, xashak-xushak uyib tashlangan bos-tirma. — Yoshlik

2. Aerostatning gaz oʻtkazmaydigan qobigʻi.

3. Suyuqlik yoki gaz saqlashga moʻljallangan shisha, metall yoki rezinadan yasalgan ogʻzi tor idish.

Shisha ballon. Rezina ballon. Gaz balloni.

Kasalxonalarda oksigen [kislorod] yostigʻini toʻldirish uchun alohida oksigen balloni bor. — N. Ismoilov, Kasallarni parvarish qilish

ot Dramatik, tarixiy-afsonaviy, fojiaviy yoxud qahramonlik mavzularida yozilgan, muayyan shakldagi lirik, liro-epik sheʼr; sheʼriy janr.

Ballada syujetiga koʻpincha insonlar hayotida tasodifan roʻy berib, ularning taqdirini hal etadigan yoki hayotida burilish yasay oladigan keskin voqealar asos qilib olinadi. — OʻzME

Eng katta burun haqida kichik ballada. — A. Obidjon, Akang qaragʻay Gulmat

ot 1. Kemalar, aerostat, lokomotiv va hokazolarning harakatlanish sifatini yoki uchish balandligini rostlash uchun ularga ortiladigan yuk.

2. trns. Temir yoʻl shpallari tagiga qum, shagʻal, tosh, domna toshqoli (shagʻali) kabi materiallardan yotqiziladigan qatlam.

Ballast poyezddan shpallarga tushadigan zoʻri-qishni iz koʻtarmasiga bir meʼyorda oʻtkazadi, shpallarning siljib ketishiga yoʻl qoʻymaydi, poyezd gʻildiraklarining relsga yumshoq urilishini taʼminlaydi. — OʻzME

3. koʻchma Keraksiz (ortiqcha) yuk; daxmaza, dardisar.

sft. Balloni bor, ballon bilan taʼminlangan; ballonga joylashtirilgan.

Ikki ballonli gaz qurilmasi. Gaz ballonli avtomobil,

Keyin gaz kirgizib berdi. Toʻgʻri, tabiiy emas, ballonli. — Harorat