Қидирув

сфт. 1. Воқеликни нафис санъат воситалари, усуллари, образлари орқали ифода этувчи; тасвирловчи.

Бадиий адабиёт. Бадиий асар. Бадиий санъат. Бадиий филм.

Бадиий адабиётнинг замири ҳаётдир. — Х. Ёдгоров, Ҳаёт тўлқинлари

Элмурод бадиий асарлар одамларнинг ташна дилларига нақадар роҳат бағишлаганини сезар, лекин бундай асарларнинг ўз тилимизда камлигидан куйинар эди. — П. Турсун, Ўқитувчи

2. Бадиийликка тегишли, мансуб.

Бадиий маҳорат. Бадиий тасвир. Бадиий тафаккур. Бадиий дид. Бадиий салоҳият.

Ижодда фақат ниятнинг ўзи кифоя қилмайди, шунга яраша бадиий салоҳият ва теран фикр ҳам зарур. — Газетадан

Бадиий фикр ўзининг шакли билан туғилади. — У. Норматов, Талант тарбияси

3. Бадиий ижод билан боғлиқ бўлган фаолиятга оид.

Бадиий раҳбар. Бадиий ҳавас-корлар тўгараги. Бадиий жамоа. Бадиий муҳит.

Бадиий ҳаваскорлик тўгараги репетиция қилаётир. — П. Турсун, Ўқитувчи

Ўзбекистонлик бадиий коллективлар ва ижрочиларнинг консертларида олтмиш мингдан ортиқ киши ҳозир бўлди. — Газетадан

Янги инсонни вояга етказиш ва тарбиялашда ижтимоий ва бадиий муҳитнинг роли катта. — Газетадан

от кам қўлл. қ. Бадиийлик.

Бадииятдан маҳрум, хом шеърлар газетада босилаверади, деган гап қаердан чиққан? — Шукрулло, Жавоҳирлар сандиғи

от эск. кт. Бадиийлик ва эстетик талабларга жавоб бера оладиган ижод ва унинг маҳсули.

У адабиёт пирлари ҳақида ёзган мақолаларида чин бадииётни сохта бадииётдан ажрата билиш таълимини берди. — Газетадан

от Бадиий-эстетик хусусиятга, бадиий мазмунга эгалик; санъатга алоқадорлик.

Бадиийлик — асарнинг эстетик таъсир кучи. — Газетадан

Ойбек романнинг мусиқавийлиги, бадиийлиги, образи бўлиши учун курашган. — ЎТА