Qidiruv

ot 1. Ogʻiz boʻshligʻining kirish qismini chegaralab turadigan harakatchan teri burmasi (Tashqi tomondan teri, ichki tomondan shilliq pardalar bilan qoplangan, uning asosini aylanma joylashgan mimika muskuli tashkil etadi).

Jahli chiqqanidan lablari pirpirab, qoshi chimirilib ketdi. — Oʻ. Hoshimov, Qalbingga quloq sol

Yoʻlchi naymi labiga qoʻyib, butun zavqi bilan chala ketdi. — Oybek, Tanlangan asarlar

2. Idishning, idish ogʻzining aylana cheti; zih.

Qumgʻonning labi. Qozon labi. Labi uchgan piyola. Xaltaning labi.

Oldiga labi uchgan taqsimchada suv qoʻydim. — Sh. Xolmirzayev, Ogʻir tosh koʻchsa

3. Qirgʻoq, yoqa, chet.

Daryo labi. Hovuz labi, Koʻlning labi.

Buloq, labiga oʻtirib, hovuchini ochganda, kaftida gʻijimlanib yotgan hoʻl roʻmolchaga koʻzi tushdi. — M. Ismoiliy, Fargʻona tong otguncha

Katta tik ariq. Ikki labi togʻ-togʻ tuproq. — I. Rahim, Chin muhabbat

4. Yerdan baland yassi sathning cheti, chekkasi.

Tomning labi. Supaning labi.

[Yoʻlchi] Ayvon labiga oʻtirib, boshini qoʻllari ostiga oldi. — Oybek, Tanlangan asarlar

Sherbek tepaning labiga, Oqsoyga yuzlanib oʻtirdi. — S. Anorboyev, Oqsoy

ot esk. Yuz ming.

Gʻozi Abdulkarim podsho Arab viloyatida xudo yoʻlida jang qiluvchi ikki lak askar paydo qildi — S. Ayniy, Doxunda

ot 1. Qizil qimmatbaho tosh; qizil yoqut.

Toshkent va Samarqandda qadimgi zamonlarda feruza, laʼl va boshqa toshlar sotiladigan bozorlar boʻlgan. — Gazetadan

Laʼl esa yoqutga nisbatan yumaloqroq, qizil, tiniq va ravshan javohir turar. — M. Osim, Karvon yoʻllarida

2. ayn. Laʼli lab;

Telba koʻnglum yor zulfi toridan ayrilmagay, Joni zorim laʼlning guftoridan ayrilmagay. — Avaz Utar.

kam qoʻll. ayn. Lash-lush.

Asalari uyalari va boshqa laq-luqlarni yigʻishtiraveringlar, Toshkentga koʻchamiz. — Mushtum

ot Chitga nisbatan zich toʻqilgan, sirti silliq ip gazlama; satin.

Koʻrpalik las.

Undan [tugundan[ qora lasdan tikilgan maxorka xalta chiqdi. — M. Muxamedov, Qaxramon izidan

Qora las toʻn kiyib, belini atlas belbogʻ bilan bogʻlagan, oyogʻida kirza etik. — A. Ibodinov, Latofat doʻkonidagi qatl

ot 1. 1 Yiqilish yoki boshqa taʼsirlardan shikastlanmoq (eti uzilmoq, koʻkarmoq, shishmoq va shu kabilar).

Ogʻir yuk koʻtarib, belim lat yedi.

Sherbek lat yegan chap qoʻliga tegishga oʻzi ham bezillar edi. — S. Anorboyev, Oqsoy

2. Zararlanmoq, shikastlanmoq (sinmoq, uchmoq, pachaq boʻlmoq va shu kabilar).

Boʻronda lat yegan tomlar, taxta devorlar remont qilindi. — Sh. Rashidov, Boʻrondan kuchli

[Haydarboy] Joʻmragi yoki qornidan lat yeb chegalatilgan koʻrimsiz choynaklarga choy damlaydi. — P. Tursun, Oʻqituvchi

3. Latviya Respublikasining asosiy pul birligi (1993 yildan).