Qidiruv

ot Biror narsa bildirish, undash va shu kabilar uchun bosh irgʻatib yoki yuz, koʻz, qosh, qoʻl harakati bilan qilingan ishora, im.

Imo bilan chaqirmoq. Imo bilan bildirmoq. Imo qilmoq.

uning soʻzlaridagi yoki koʻzlarining imosidagi va qoʻllarining harakatidagi maʼno va ohang boyligiga goʻyo zavqlangandek razm solar edi. — Oybek, Oltin vodiydan shabadalar.

Gʻulomjon kutilmagan tashrifning maʼnosiga tushunsa ham, bolalarni qoʻl imosi bilan turgʻizdi. — M. Ismoiliy, Fargʻona tong otguncha.

ot Shaxs, hodisa, narsaning ommalashtirish, reklama qilish va hokazo maqsadlarda odamlarga hissiy-ruhiy taʼsir koʻrsatishni koʻzlab shakllantiriladigan qiyofasi.

ot 1. Yozuv.

Eski imlo. Yangi imlo. Lotin alifbosi asosidagi imlo.

Ganga chechan, eski imloda har qanday xat ishlarini boshqaradigan bu kishini odamlar ancha hurmat bilan mulla Alimqul deb atashardi. — P. Tursun, Oʻqituvchi

2. Toʻgʻri yozuv.

Imlo qoidalari.

3. Yozuvga, toʻgʻri yozuvga oid; imloviy.

Imlo xatolari.

Redaksiyaga material yoʻllashdan oldin, juda boʻlmasa, imlo xatosiz yozishni oʻrganib oling. — F. Musajonov, Himmat.

ot 1. Namozda jamoatning oldida turib, namozni boshqaruvchi, ularni oʻziga iqtido ettiruvchi shaxs.

Namoz shu yerda, mehmonxonada oʻqildi, Abdishukur imom boʻldi. — Oybek, Tanlangan asarlar

2. Islom peshvolarining unvoni.

Sizga kim aytdi, madrasadan chiqqanlarning hammasi imom yoki qozi boʻladi deb. — M. Ismoiliy, Fargʻona tong otguncha.

3. Imom (erkaklar ismi).

ot 1. din. Xudoga boʻlgan ishonch, eʼtiqod; koʻngilda ishonish va tilda iqror qilish.

Imoniga, diniga mustahkam pokiza odam bor joydan ajina yuz chaqirim nariga qocharmish. — S. Ahmad, Hukm

Vatanni sevmoq ham, ilm oʻrganish ham, kattalarni hurmat qilish ham, tozalik ham imondandir. — Gazetadan

Masalan, Paygʻambarimizdan rivoyat qilinadiki, Imon oltmishdan ziyod shuʼbalardan — tushunchalardan tashkil topgan, hayo esa oʻshalarning biridir. — Gazetadan

2. Umuman, ishonch.

Mufti oʻz ixtiyoridagi turli vositalar orqali Mirzoni tekshirib koʻrdi. Uning sof millatchi muhojir ekaniga imon hosil qildi. — A. Hakimov, Ilon izidan

ot Shaxsning oʻz qoʻli bilan maxsus yozuv-chizuv (shakl)da ifoda etilgan va uning oʻzi ekanini bildiruvchi belgi; qoʻl.

Xatdagi sodda, yoqimli soʻzlar, uning tanish imzosi, dala pochtasining besh raqamli adresi — bularning hammasi Eralining sogʻ-salomatligidan dalolat berib turar edi. — I. Rahim. Chin muhabbat.

Mard odam imzosini ochiq qoʻyadi, qurbaqadek kavakda bekinib yotib qurillamaydi. — S. Siyoyev, Otliq ayol