Поиск

sft. 1. Tez, darhol sezadigan; sezgir, ziyrak.

Sergak soqchi. Sergak boʻlmoq. Sergak tortmoq.

Kiyikdek sergag-u hush-yor chavandoz Qadam qoʻyganda togʻlar qilgan ovoz. — Habibiy

Malohat ham sergak oʻtirar, ikki qulogʻi munozarada edi. — S. Nurov, Narvon

2. Tez fahmlaydigan; zehni oʻtkir; farosatli.

Sergak oʻquvchi.

Koʻngil qoʻygan yigiting sergak boʻla qolsa, dilingdagini tushunib, gapingga monand javob qilsa — R. Fayziy, Choʻlga bahor keldi

3. Uygʻoq; uxlagan emas.

Mahkam yoniga agʻdarilib yotdi va koʻzini yumdi. Lekin butun vujudi sergak edi. — P. Qodirov, Uch ildiz

— Darhol darvozalar yaqinidagi mahallalarga xabar qil, uxlamasinlar, sergak boʻlib tursinlar! — dedi Temirtosh. — Yoshlik

sft. 1. Koʻp gapiradigan, ezma.

Sergap chol.

Korfarmo Ahmad Chalabiy qirq yoshlarga borgan, yoʻgʻon, qanshari past, koʻzlari oʻynab turadigan sergap odam. — Mirmuhsin, Meʼmor

Qiziq, shunday kamgap odam bilan sergap, ezma Sabohat xola qanday qilib qirq yildan ortiq birga turmush qilishgan? — Yu. Shomansur, Qora marvarid

2. salb. Quruq gap, safsata sotishni yaxshi koʻradigan, gap chaynaydigan; doim javrab yuradigan, vaysaqi.

Bizda ham sergap, quruq maslahat beradiganlar juda koʻp, lekin amalda hech foyda yoʻq. — T. Obidov, Yusufjon qiziq

sft. 1. Gʻalvasi, janjal-suroni koʻp; gʻalvali.

Sergʻalva joy.

Sayyora shu sergʻalva xonadonga kelin boʻlib tushib, nima huzur-halovat koʻrdi? — Gazetadan

Odam yashar zamon yukin orqalab, Sergʻalvaroq kechasidan buguni. — E. Vohidov, Muhabbat

2. Koʻp gʻalva, janjal qilaveradigan; janjalkash.

Sergʻalva odam.

sft. ayn. Sertashvish.

ot Sergak, ziyrak boʻlish xususiyati.

Unda talant bilan birga intilish, harakat va sergaklik bor. — Gʻ. Gʻulom, Talant va mahorat

Toʻlqinjon Hurining soʻzlarini zoʻr diqqat va sergaklik bilan tingladi. — F. Musajonov, Huri

ot Sergap, ezma xususiyatga egalik.

Mansuriyning tuturiqsizligida, ser-gapligida va maqtanchoqligida uning xarakteri yaxshi gavdalantirilgan. — OʻTA