Qidiruv

sft. 1. Zulm qiluvchi, zulmkor, jabr qiluvchi.

Ilonning zahri yomon. Zolimning qahri yomon. — Maqol

Faqat xotinlargina zolim podshoni qargʻab chinqirishar, yigʻlashar edi. — Oybek, Tanlangan asarlar

Akram hoji savolida davom etdi: — Hokimingiz juda zolim emish, bu toʻgʻri soʻzmi? — A. Qodiriy, Oʻtgan kunlar

Mamlakat parokanda, zolim tojdorlar qon ustiga qon toʻkurlar [dedi Mavlono Fazliddin]. — P. Qodirov, Yulduzli tunlar

2. Rahm-shafqatni bilmaydigan, berahm.

Zolim er.

Borib ayting oʻshal zolim yigitga, Uning ishqi bu bagʻrimga tutashdi. — H. Gʻulom, Mashʼal

3. Berahmlikni, shafqatsizlikni ifodalovchi.

Gulsumbibi indamadi, yolgʻiz zolim koʻzlari bilan oʻqraydi-da, ayvonning bir chekkasida, kasal kabi, choʻzilib yotdi. — Oybek, Tanlangan asarlar

4. Jabr-zulm bilan toʻlib-toshgan, qahrli.

U [Yoʻlchi] oʻz singlisini Gulnordan ayirib, uni zolim tanholik quchogʻiga otishni istamaganidan, yana bir necha vaqt Unsinni bu yerda qoldirishga moyil edi. — Oybek, Tanlangan asarlar

ot Zulm qilishlik, shafqatsizlik.

Zolimlik qilmoq.

Demishlar mulk vayronadir, Agar zolimlik etsa shoh. — E. Vohidov, Muhabbat

Uni [boyni] yuz-xotir qilmay, zolimligini dangal yuziga solishdi. — K. Yashin, Hamza

Ammo egachingizni xohlamagan odamiga zoʻrlab uzatsalar, shuning oʻzi katta bir zolimlik boʻlmagaymi? [dedi Xonzoda]. — P. Qodirov, Yulduzli tunlar

rvsh. Zolimlarga xos ravishda; zolimlarcha, shafqatsizlarcha.

Azizbekning bu zolimona buyrugʻiga qarshi qattiq soʻzlar aytishni oʻylasa kom, achchigʻini qanday kishiga aytilishini oʻylab, oʻzini bir oz yigʻdi. — A. Qodiriy, Oʻtgan kunlar

[Zaynab] Xushroʻyning yuzida zolimona bir istehzo koʻrdi. — A. Qodiriy, Oʻtgan kunlar