Поиск

Oʻzbekiston Respublikasi Buxoro viloyati Buxoro tumani hududida, uncha katta boʻlmagan tepaliklarda joylashgan, mutlaq balandligi 235—270 m. Kon 1984 yilda ochilgan. Neft va gaz zaxiralari XV-P va XV-HP gorizontlaridagi rif jinslar majmuasi bilan bogʻliq. XV-P gorizontda jinslarning paydo boʻlish sharoitlari boʻyicha aniq farq qiluvchi rif va rif oraligʻi zonalari mavjud. Rifli zonada gorizont yotqiziqlari rif fatsiyali katta qalinlikdagi kovakli va gʻovak-kovakli ohaktoshlardan tashkil topgan. XV-HP gorizont jinslari litologik tarkibi boʻyicha XV-P gorizontidagi jinslaridan deyarli farq qilmaydi, suvoʻtli, qumoq-qumoq organogen ohaktoshlar tarkib topgan. Neftgazkondensat uyumi rifli massivning yuqori qismida joylashgan. Gaz-neft va suv-neft tutash yuzalari holati gorizontal boʻlib, mos ravishda 2116 m va 2160 m dan oʻtadi, ushbu joylarda neftli qatlamlarning qalinligi 44 m, gazli 49 m va neftgazli 93 m. Kesimning gaz va neftli qismi oʻrtacha gʻovakligi mos ravishda 0,17, 0,155, gaz va neftga toʻyinganligi 0,80, 0,78, oʻtkazuvchanligi qatlamlanish boʻyicha 0,464, 0,185 mkm² va perpendikulyar yoʻnalishda 0,053, 0,0797 mkm². Neftning oʻrtacha zichligi 876,8 kg/m³. Uning tarkibi (ogʻirligiga nisbatan %da): oltingugurt 0,51—2,61; parafin 0,97—5,54; asfaltenlar 1,80—9,04; smola 1,75—6,79. Erkin gaz tarkibida metan 91,15—92,50%, uning havoga nisbatan zichligi 0,627—0,636. Gazning tarkibida (%da): azot 0,04—0,63; karbonat angidrid gazi 2,48—3,37; vodorod sulfid 0,13; geliy 0,02—0,0255. Gaz kondensatning oʻrtacha zichligi 693,2—725,5 kg/m³, oltingugurt miqdori 0,057—0,078 %. Kondan 2002 yilning yanvarigacha 3152,8 ming t neft, 949,7 ming m³ suv va 204,6 mln. m³ yoʻlakay gaz olingan. Joriy neft bera olishlik koeffitsiyenti 0,248 ga teng., Quruq neftgazkondensat koni