fl. 1. Batartib terib, taxlab qoʻymoq; sigʻdirmoq, qoʻymoq.
Yashiklarga olma joylamoq. Vagonlarga yuk joylamoq. Kitoblarni tokchalarga joylamoq.
[Gulnor] Sanoqsiz asboblar, idishlarni pala-partish yigʻishtirib, sandiqlarga joyladi. — Oybek, Tanlangan asarlar
2. Solmoq, solib bekitib qoʻymoq.
Miltiqqa oʻq joylamoq.
Koʻldosh bobo pulni poʻstinning ich choʻntagiga ehtiyotlab joylab qoʻydi. — H. Gʻulom, Toshkentliklar
3. Biror ish yoki oʻqishga kirgizib qoʻymoq.
Oʻqishga joylamoq.
Nikanor ota uni oʻgʻliga qoʻshib, ustaxonaga ishga joylab qoʻydi. — S. Ahmad, Hukm
Oʻsha zamonda oʻlib ketgan xolavachchasining oʻgay oʻgʻli doktor boʻlgan ekan, uni urishib-urishib, kasalxonaga joylab qoʻydi. — A. Qahhor, Toʻy