ot 1. Biror kimsa yoki narsaga qaratilgan diqqat-nazar, fikr, yod.
Eʼtiborini jalb qilmoq. Eʼtibor bilan razm solmoq.
Otabek diqqat va eʼtibor bilan qutidorni kuzatib, javob berdi. — A. Qodiriy, Oʻtgan kunlar
Bir uy mehmonning eʼtibori jajjigina — Azizjonda, Gazetadan
2. Oʻzga tomonidan boʻlgan hurmat hissi; qozonilgan hurmat; obroʻ, nufuz.
Eʼtibori ketdi. Eʼtibori yoʻqoldi.
Nizomiddinning koʻz oldida bu notanish odamning eʼtibori yanada oshdi. Mirmuhsin, — Meʼmor
Garchand baʼzi joyda topdim eʼtibor, Koʻksimda nelardir taratur ziyo. — A. Oripov
3. Eʼtibor (xotin-qizlar ismi).
- Eʼtibor bermoq Diqqat-eʼtiborni qaratmoq, eʼtiborini yoʻnaltirmoq. Boyvachchaning orqasida ot qoʻyib kelayotgan odamga eʼtibor bering. — K. Yashin, Hamza
- Eʼtibor qilmoq Maston unga eʼtibor qilmay, otning ochiq qolgan koʻzlariga qaradi. — A. Qahhor, Maston
- Eʼtiborga olmoq Hisobga olmoq, nazarda tutmoq. Sen aytgan ikki narsa ilmga maʼlum ekanligini eʼtiborga olsak, sen oʻtkazadigan tajribaning asosiy vazifasi mana shu savolga javob berish. — A. Qahhor, Qoʻshchinor chiroqlari
- Eʼtibor qozonmoq (yoki topmoq) Obroʻ-hurmatga ega boʻlmoq, yaxshi nom chiqarmoq. [Hoji] Normuhammad qushbegi oldida undan ham yuqoriroq va maʼnoliroq eʼtibor qozondi. — A. Qodiriy, Oʻtgan kunlarToshkent chamanzor — Butun xalq oldida topdi eʼtibor. — X. Rasul.
- Eʼtiborga tushmoq Kishilar eʼtiborini tortib, oʻziga jalb qilmoq. Keyinchalik ustod Qavom eʼtiboriga tushib, uning tavsiyasi bilan Mirzodan ish olgan edi. — Mirmuhsin, Meʼmor
- Eʼtibordan qolmoq Koʻpchilikning diqqat-eʼtiborini yoʻqotmoq. Agar yulgʻichlikni tashlamasangiz, xalq eʼtiboridan qolib, sharmanda boʻlasiz. — Mushtum
- Eʼtibori bilan Jihat(i)dan, koʻra. Badiiy tarjima mohiyat eʼtibori bilan xalqlar oʻrtasida oltin koʻprikdir. — X. Yodgorov, Hayot toʻlqinlari