sft. 1. Oraliq masofasi (nisbatan) katta, nisbatan narida joylashgan; olis.
Uzoq qishloqdan keldi. Ovozi uzoq-uzoqlarga yetmoq. Tuyaga minib, uzoqni koʻzla. — Maqol
Sidiqjonning koʻzi daryoning u tomonida, uzoq ufqda miltillab turgan son-sanoqsiz chiroqlarga tushdi. — A. Qahhor, Qoʻshchinor chiroqlari
Bir mahalda uzoqda qora nuqta koʻrindi. — Mirmuhsin, Meʼmor
2. Vaqt eʼtibori bilan davomli, katta, koʻp.
Uzoq tikilmoq. Uzoq suhbatlashmoq. Uzoq kutmoq. Uzoq muddatli kredit. Uzoq yashamoq.
Bu jang uzoqqa bormaydi. — Mirmuhsin, Meʼmor
Sidiqjon uzoq sukut qilib qolgandan keyin bosh chayqadi. — A. Qahhor, Qoʻshchinor chiroqlari
3. Doʻstlik, qarindoshlik, tanishlik va shu kabilar jihatdan bogʻlanish u qadar yaqin boʻlmagan, yaqin emas.
U yerda Elmurodning ham bir emas, koʻpgina uzoq qarindosh-urugʻlari bordir. — P. Tursun, Oʻqituvchi
Mehmon uzoq qarindosh — otasining ammavachchasi — Ashirmat edi. — Oybek, Oltin vodiydan shabadalar
Nurining nikoh kuni u begona qiz — uzoq qiz butunlay tanish va yaqin boʻlib qoldi. — Oybek, Tanlangan asarlar
4. koʻchma Bevosita aloqasi, munosabati yoʻq; aloqasiz.
Bundoq maslahatlarda mahkama sohibi, ammo ilm-u fandan uzoq Ahmad Chalabiy ham bir chekkada esnab oʻtirardi. — Mirmuhsin, Meʼmor
Sultonmurod shu vaqtgacha xalq tirikchiligidan uzoq yashar, uning dardlariga begona edi. — Oybek, Navoiy
- Koʻzdan uzoq Nazar-eʼtibordan chetda. Koʻzdan uzoq yur, uqdingmi? — Oybek, Navoiy
- Uzoq gap Oftob oyim qarindoshlaridan jonkuyar deb tanilgan kishi Kumushbibining togʻasi — Ahmadbek boʻlib, u ham umrining koʻpini Qoʻqondami, Xoʻjanddami oʻtkazar, shuning uchun undan yoriy kutish ham uzoq gap edi. — A. Qodiriy, Oʻtgan kunlar
- Uzoq yili Oʻtgan yildan oldingi yil, burnogʻi yil. Buxoroda, uzoq yili betob boʻlib yotganida ham, koʻziga shunday murdalar, alvastilar koʻringan edi. — Mirmuhsin, Meʼmor
- Uzoqni koʻrmoq Kelajak haqida toʻgʻri fikr yurita bilmoq, oqibatini oʻylab ish tutmoq. Bugunni emas, uzoqni koʻrish kerak, kosoving uzun boʻlsa, qoʻling kuymaydi. — A. Muxtor, Qoraqalpoq qissasiHamma balo shu savodsizlikdan chiqyapti. Uzoqni koʻrolmaydi. — S. Ahmad, Hukm
- Uzoqqa bormaydi Koʻp davom etmaydi, tez fursatda barham topadi, tamom boʻladi. Endi oʻzini qayoqqa ursa ham, uzoqqa bormaydi. Hisobotini eshitamiz-u, tamom. — P. Tursun, Oʻqituvchi
- Uzogʻi bilan Koʻp deganda, koʻpi bilan. Uzogʻi bilan ikki-uch kun ichida ishingizni olasiz. — N. Safarov, Hayot maktabi
- Ehtimoldan uzoq emas Amalga oshishi oson, boʻlishi mumkin.