ot 1. Qoraqayinlar oilasiga mansub doim yashil bir turli daraxtning (poʻkak dubining) poʻstlogʻidan tayyorlanadigan yengil material.
Poʻkakning yengillik, shovqin va issiqlikni oʻtkazmaslik xususiyatlari.
Poʻkak qurilish materiallarining eng yengili hisoblanadi. — Fan va turmush
2. Shunday materiallardan qilingan tiqin; probka.
Bir mahalda koʻzi olazarak boʻlib qoʻshnimning oʻzi xonamga kirdi. Eshikni zichlab yopdi-da, shimining choʻntagidan poʻkagi ochilgan bir shisha vino olib, stol ustiga qoʻydi. — S. Ahmad, Saylanma
3. Ichi kavak, poʻk.
Gʻiyosiddin suyanadigan tollarning ichi poʻkak boʻlib, nurab qolgan edi. — S. Ahmad, Hukm
4. koʻchma Boʻsh, lapashang.
Sen toʻngaklar munchalik poʻkak boʻlmaganlaringda, bunaqangi sasimasdilaring. — H. Shams, Dushman
Poʻkaklarni olib otar qirgʻoqqa, Mardlar yuragini obod etar vaqt. — B. Boyqobilov, Meni kuting, yulduzlar
5. koʻchma Maʼnosiz, boʻsh.
Zamiraning hayoti Ravshanga qahramonlikdek boʻlib tuyuldi. Uning kunlari esa bekorga oʻtdi, hayoti poʻkak, bemaʼno. — F. Musajonov, Ravshan