fl. 1. Olmoq feʼlining birgalik nisbati. Fikr olishmoq.
Oshdan Yemagan boʻlsangiz, siz ham olishing, — dedi bek. — A. Qodiriy, Oʻtgan kunlar
2. Urishmoq, kurashmoq, jang qilmoq; mushtlashmoq.
Qahhor va Ozod olisha ketishdi. Ozod bir amallab uning iskanjasidan chiqarkan, qayta soʻradi: — Nima gap oʻzi? — Yoshlik
3. koʻchma Biron-bir toʻsiqni yengish, uni bartaraf etish maqsadida tinimsiz harakat qilmoq.
Kanalga kelmaganlar paxta bilan olishib yotishibdi. — S. Ahmad, Ufq
Butun xalq Konibodomdan Uchqoʻrgʻongacha choʻzilgan qurilishda tinim bilmay mehnat qilar, yer bilan, toshu shagʻallar bilan olishardi. — S. Ahmad, Ufq
4. koʻchma Bahslashmoq, haq-huquq talashmoq, tortishmoq; bir-birini yengish uchun tirishmoq.
Hakimboyvachchaning yaqin doʻstlaridan bir kishi Mirzakarimboyga orqavorotdan tip tekizganini eshitib, u bilan uzoq zamon olishgan. — Oybek, Tanlangan asarlar
Qudrat kambagʻallar tarafini olib, qishloq baloxoʻrlari bilan olishmagan kunini bilmaydi. — M. Ismoiliy, Fargʻona tong otguncha
- Bel olishmoq Kurashmoq, kurash tushmoq, bellashmoq. Men koʻp davralarda bel olishganman. — S. Ahmad, Ufq
- Yoqa olishmoq Yoqasidan tutib boʻgʻishmoq, urishmoq.
- Don olishmoq Xotini avtobusda qaytayotib, Eshqobil ferma sigir sogʻuvchisi Yorozgul bilan don olishib yuradi, degan gapni eshitib qolibdi. — Yoshlik
- Qoʻl olishmoq Kelishmoq, bir toʻxtamga kelmoq. Har gal Mirvali Rahimov bilan uchrashganda, qiziqchilik orasida, qoʻl olishganlarini eslatib qoʻyardi. Rahimov unga, sabr qiling, deb qoʻyardi. — S. Ahmad, Jimjitlik