Қидирув

от 1. Сой, кўл, ариқ, дарё каби сув ҳавзаларининг суви камайиб, таги юзароқ бўлиб қолиши.

Кўлнинг саёзлиги.

2. Таги унча чуқур бўлмаган, саёз жой.

Саёзликнинг нариги томонидаги дарё тармоғига тушиб кўрган эди, чуқур экан, бўй бермади. — Ж. Шарипов, Хоразм

3. кўчма Юзакилик, бирор соҳада билим ва маҳоратнинг етарли бўлмаслиги.

Унинг оригинал ижодига тасвирда саёзлик ва сохтакорлик қандай ёт бўлса, таржималари ҳам худди шундай табиий жаранглайди. — Ғ. Саломов, Таржима назариясига кириш

Ўқийман, деб икки йил институтга борди, киролмади. Билими саёзлик қилдими ё омади чопмадими — С. Сиёев, Отлиқ аёл

сфт. 1. Унча чуқур бўлмаган, чуқур эмас (дарё, кўл, ариқ ва шу кабилар ҳақида).

Ҳали ёмғирлар бошланмагани учун, анҳор суви тиниқ, лекин тошлари кўриниб турган саёз чеккалари шишадай рангсиз-у, чуқур жойлари кўкимтир-яшил. — П. Қодиров, Уч илдиз

Биз, бир эшелон солдат, бепоён даштга тушиб, саёзгина дарё бўйида чодир тутиб ётардик. — О. Ёқубов, Излайман

2. рвш. Юзалаб, чуқурлашмасдан.

Бошлиқ, бир колхоз тракторчиси ўн уч гектар ерни саёз ҳайдагани учун суд уни қайта текинга ҳайдаб беришга ҳукм чиқарганлигини айтиб берди. — Ж. Абдуллахонов, Тўфон

Саёз оққан дарё шағиллайди, деганларича бор экан. — С. Кароматов, Ҳижрон

3. кўчма Мазмунан сийқа, юзаки, ғўр.

Хом-хатала асарларга, ғоявий-бадиий саёз буюртмаларга чек қўйиш вақти аллақачон келди. — Газетадан

[Салимхоннинг] Илми жуда саёз, фақат қақиллаб гапириши бор — Мирмуҳсин, Умид

фл. 1. Суви камайиб ёки тош, шағал, балчиқ тўпланиши оқибатида таги юзароқ бўлиб қолмоқ.

Баҳор чоғлари тезобликни ҳаддан оширса, кузга яқин [дарёнинг] таги кўринар даражада саёзланиб қолади. — Ж. Абдуллахонов, Хонадон

2. кўчма Мазмунан юзаки бўлмоқ.

Фикрингиз саёзланиб қолибди.

фл. айн. Саёзланмоқ 1, 2.

Дарёнинг саёзлашиши.

фл. Саёзлашмоқ феълининг орттирма нисбати.

Мелкая река (пуще) гремит.