сфт. 1. Катта пул турадиган, қиммат баҳога эга, қимматли.
Қимматбаҳо совға. Қимматбаҳо буюм. Қимматбаҳо тошлар.
Ҳоким супада ёнбошлаб ётган ерида тўрт бармоғи қимматбаҳо олтин узуклар билан безатилган чўзинчоқ панжасини узатди. — М. Исмоилий, Фарғона тонг отгунча
Самарқанд подшоҳига олтин-кумуш совғалар қимматбаҳо саруполар инъом қилдилар. — П. Қодиров, Юлдузли тунлар
Қимматбаҳо металларга платина, палладий, осмий ва уларнинг бир-бирлари ва бошқа оддий металлар билан ҳосил қилган қотишмалари киради. — Фан ва турмуш
2. кўчма Баҳоси ёʻқ, бебаҳо.
Қимматбаҳо, гавҳарга тенг сўзларингиз ярамга малҳам, дардимга даво бўлди. — Шарқ юлдузи
- Қимматбаҳо (ёки қимматли) қоғозлар Ўз эгасига мулкка эгалик ҳуқуқини ва даромад кўринишида муайян пул суммасини олиш ҳуқуқини берадиган пул ёки товар ҳужжатлари — аксия, облигация, аккредитив, вексел, чек ва шу кабилар. Ушбу Низом қимматбаҳо қоғозлар бланкаларини ишлаб чиқаришни лицензиялаш тартибини белгилади. — Газетадан