ot 1. Maʼlum muddat oʻtgandan keyin qaytarish sharti bilan berilgan yoki olingan narsa (pul, buyum, gʻalla va shu kabilar).
Qarz(ga) olmoq. Qarz koʻtarmoq. Qarz(ga) bermoq. Qarzni toʻlamoq.
Qarzdan qutulmoq. Men sizdan yuz soʻm qarzman.
Afandining bir baqqoldan ellik uch tanga qarzi bor edi. — Latifalar
2. Ishlatganlik, foydalanganlik uchun toʻlanadigan narsa (asosan pul).
Toʻlov qarzlari. Soliq qarzlari.
3. koʻchma Kimsaning zimmasidagi vazifa, majburiyat, burch.
Yoshning hurmati — qarz, Qarining hurmati — farz. — Maqol.
Oʻgʻil onasidan qarzin uzganday, Togʻ ham oqlayotir ona sutini. — Guldasta
Adabiyot va sanʼat arboblarining talabchan kitobxonlar va tomoshabinlar oldida hali qarzi koʻp. — Gazetadan
4. koʻchma Ado etilishi, bajarilishi shart boʻlgan ish, vazifa.
rektorat ham uning ikkita imtihondan qarzi borligini hisobga olib, bu qarorni tasdiqlagandi. — Oʻ. Hoshimov, Qalbingga quloq sol
Sen humparni qancha soʻksam, yana boʻynimda qarz qoladi. — A. Qahhor, Qoʻshchinor chiroqlari
- Qarzga botmoq Zimmasidagi qarzi juda ham koʻpaymoq, koʻp boʻlmoq. Kechagina kimsan — Shomurod boyvachchaning oʻgʻliman, deb kerilib yurgan Normurod qulogʻigacha qarzga botib, kafangado bir yigitga aylandi-qoldi. — O. Yoqubov, Diyonat
- Qarzi qiyomat, qiyomat qarzi yoki qiyomati qarz Tiriklikda toʻlanishi yoki ado etilishi shart boʻlgan qarz.
- Qarzi hasana
- Ham farz, ham qarz Albatta qilinishi, bajarilishi shart, degan maʼnodagi ibora. Hazili yoʻq. Uylanish sizga ham farz, ham qarz. — A. Qodiriy, Mehrobdan chayon