Qidiruv

Koʻp vazifali va koʻp foydalanuvchili operatsion tizimlar guruhi. Birinchi UNIX tizimi 1969 yilda AT&T kompaniyasining Bell Labs boʻlinmasida ishlab chiqilgan. Undan keyin koʻplab turli UNIX tizimlari yaratilgan. UNIX tizimlarining asosiy xususiyatlariga quyidagilar kiradi: tizimni sozlash va boshqarish uchun oddiy matn fayllaridan foydalanish, buyruqlar qatori orqali bajariladigan utilitalardan keng foydalanish, foydalanuvchi bilan virtual qurilma – terminal orqali oʻzaro ishlash, har biri bitta vazifani bajaruvchi bir necha dasturdan iborat konveyerlardan foydalanish va h.k. UNIX serverlarda hamda turli uskunalar uchun ichiga oʻrnatilgan tizimlar sifatida, shuningdek, shaxsiy kompyuterlarda ham ishlatiladi.

UNIX operatsion tizimining Novell korporatsiyasi tomonidan ishlab chiqilgan versiyasi. UNIXWare birinchi navbatda NetWare tarmoqlarida ishlatish uchun yaratilgan. Shu bilan birga, bu operatsion tizim muhitida hududiy tarmoqlarning protokollari ham bajariladi. UNIXWare oddiy grafik interfeysga ega. Ushbu 32-xonali tizim “ish stoli” deb ataluvchi muhitda ishlaydi. UNIXWare koʻp vazifali, koʻp foydalanuvchili va koʻp oqimli tizimdir.

AT&T kompaniyasi tomonidan ishlab chiqilgan va 1989 yilda chiqarilgan UNIX operatsion tizimining turi. Uning System V Release 4 (SVR4) versiyasi UNIX turidagi operatsion tizimlarning umumiy xususiyatlari uchun manba boʻlib xizmat qildi, masalan, tizim initsializatsiyasi ssenariylari – SysV init scripts (/etc/init.d) va tizim ishini tavsiflovchi standart – System V Interface Definition (SVID).

UNIX taʼsiri ostida tashkil topgan operatsion tizim. Ushbu atamaga Bell Labsning UNIX tizimi asosida yaratilgan erkin va ochiq operatsion tizimlar yoki uning imkoniyatlari va ishlanmalarini taqlid qiladigan tizimlar, shuningdek, UNIX dastlabki kodiga asoslangan versiyalar kiradi.