fl. 1. Narsa yoki kimsani biror tomonga yoki joyga yoʻllamoq, joʻnatmoq.
Xat yubormoq. Sovgʻa yubormoq. Pul yubormoq. Vakil yubormoq. Bemorni kasalxonaga yubormoq.
Siz, shahanshoh, oʻsha soati muzaffarni tayin aylab, biz qullariga xabar yuborsalar. — A. Qodiriy, Oʻtgan kunlar
Shohrux viloyat-u oʻlkalarga koʻproq oʻz oʻgʻillarini yubordi. — Mirmuhsin, Meʼmor
2. Quymoq, kiritmoq.
Vrach bemorning venasiga dori yubordi.
3. koʻm. fl. vzf. (i)b shaklli yetakchi feʼl bilan qoʻllanib, harakatning tugal, kuchli tarzda, qoʻqqisdan bajarilishi kabi maʼnolarni bildiradi.
Qizitib yubordi. Qichqirib yubordi. Qoʻrqitib yubordi. Yiqitib yubordi. Unutib yubordi.
- Jahannamga yubormoq Nobud qilmoq, oʻldirmoq. — Pashsha talayaptimi, hozir hammasini jahannamga yuboramiz, qoracham! — pashshalarni ezib davom etdi Joʻra. — Oybek, Tanlangan asarlar