Поиск

sft. 1. Ilgari boʻlmagan, endi yuzaga kelgan (kelayotgan, keladigan).

Yangi ariq. Yangi texnologiya. Yangi devor. Yangi zavod. Yangi yoʻl. Yangi ilmiy yoʻnalish. Yangi korxona. Yangi uy. Yangi shahar. Yangi nav.

Tinchlik-omonlik boʻlsa, bir kun kelib, yangi dangʻillama imoratlar solib ham, hozirgiday, shunchalik gap ekan-ku, deymiz. — A. Qahhor, Qoʻshchinor chiroqlari

U doʻstlariga tunov kungi yangi sherini maʼqul qilolganiga quvonardi. — S. Siyoyev, Yorugʻlik

U Mirmurodovni har koʻrganda: — Yangisi bormi, eshitaylik, — deb soʻraydigan boʻldi. — Guldasta

2. Hali tutilmagan yoki juda kam ishlatilgan, asl holatini yoʻqotmagan; zid. eski.

Yangi kiyim. Yangi mashina.

Dushanba kuni yangi banoras toʻn va yangi yashil baxmal doʻppimni kiyib, idoraga bordim. — Guldasta

3. Ish-faoliyati, hayoti endi boshlangan, boshlanganiga hali koʻp boʻlmagan; yangi qilingan.

Bu ishda u yangi, yordam berish kerak.

U — yangi hisobchimiz Oqpoʻlat akaning yakka-yu yagona arzanda oʻgʻli. — S. Siyoyev, Yorugʻlik

Sattorqul yangi rais boʻlsa ham, shoshmasdan koʻklamni tizginlab oldi. — A. Qahhor, Qoʻshchinor chiroqlari

Nihoyat, otasi oʻz muddaosiga yetdi — qizini yangi kuyovga topshirib tinchlandi. — A. Qodiriy, Oʻtgan kunlar

4. Oʻzaro navbatda avvalgisidan keyingisi; navbatdagisi, endigisi.

Yangi direktor. Yangi lavozim.

Bilim maskanlarida yangi oʻquv yili boshlandi. — Gazetadan

Ha, tongni qarshilab olsa-da takror, Yangi deb ataydi har kunni odam. — A. Oripov

5. Shu yil, shu mavsumga tegishli; shu yilga oid; dastlabki.

Shoʻrvaga yangi kartoshka solindi. Yangi bugʻdoyning noni.

Yangi hosilni peshma-pesh qabul qilish va undan sifatli tola ajratib olishga ham puxta hozirlik koʻrildi. — Gazetadan

Yangiyer.

sft. 1. Ilgarigilarga oʻxshamagan holda, yangi usulda, yangi tartibda.

Biz yangicha ishlaymiz, yangicha yashaymiz.

Yangi supurgi yangicha supuradi, deb toʻgʻri aytarkanlar. — J. Abdullaxonov, Toʻfon

U butunlay yangicha kiyingan: oyogʻida gʻarchli sariq botinka, egnida kulrang kostyum, sochini juda silliqlab, orqasiga taragan edi. — P. Tursun, Oʻqituvchi

2. sft. Ilgarigilarga oʻxshamaydigan, yangi urf boʻlgan.

Yangicha turmush. Yangicha kiyinish. Yangicha munosabat.

Abdishukurning tili qichib, yangicha toʻy haqida mufassal izoh bermoqqa chogʻlangan edi, lekin soʻzni Hakimboyvachcha ilib ketdi. — Oybek, Tanlangan asarlar

[Abdusamad qori:] Men bir oz eskicha oʻqiganman, yangichaga hali mashqim rosa boʻlgan emas. — A. Qahhor, Qoʻshchinor chiroqlari

rvsh. Qaytadan, qayta boshdan, boshqatdan, yangitdan.

Maqolani yangidan tahrir qilish kerak.

Goʻyo boʻlib oʻtgan mojaro yangidan boshlanib, endi Abdurasul daʼvogar boʻladiganga oʻxshar edi. — P. Tursun, Oʻqituvchi

Koʻm-koʻk osmon xuddi artilgan shishadek tiniq. Goʻyo olam yangidan yaratilgan. — S. Ahmad, Hukm

ot 1. Yangi holat, yangi ekanlik.

Kiyimning yangiligi. Rahbarning yangiligi.

2. Ilgari maʼlum boʻlmagan, yaqindagina paydo boʻlgan narsa yoki hodisa; yangi xabar, maʼlumot.

Fan va texnika yangiliklari.

Qanday qilib boʻlardi, ish unumini oshiradigan yangilik oʻylab chiqdingiz-ku, yana bir yangilik kiritsangiz, ancha odam boʻshab qolishi tabiiy. — Sh. Rashidov, Boʻrondan kuchli

Zorqishloqda har kuni bir yangilik, har kuni bir moʻjiza yuz berardi. — S. Ahmad, Hukm

Sizning ana shu yangilik tarafdori ekaningizga hamma qoyil. — J. Sharipov, Saodat

Akram Adolatni yaxshi koʻradi. Qani, marhamat etib, mana bu yangilikni eshiting-chi, yoqarmikan sizga. — S. Anorboyev, Oqsoy

Sayfulla kun sayin bir yangilik topib kelardi: — Domla Tohirni, Mansurga koʻtartirib qoʻyib, qamchi bilan quymichiga xoʻp savaladi. — P. Tursun, Oʻqituvchi

jaqında, jaqında ǵana, házir ǵana