Қидирув

сфт. 1. Хати бор, ёзувли.

Хатли қоғоз.

Акбаржоним отлидир, Салласи гул хатлидир. — Қўшиқлар

2. Хат-саводи бор, ёзув-чизувни биладиган.

У [Ғ. Ғулом] Менинг саводли, хатли бўлишимга бошида отам, сўнгра онам сабаб бўлдилар, деб таъкидлайди. — Ҳ. Ёқубов, Ғафур Ғулом ҳаёти ва ижоди

от 1. Ёзув, ёзилган, чизилган ёки ўйиб туширилган белгилар; матн.

Олим тошга ўйилган қадимий хатни ўқишга уринди.

Хат кичикроқ қоғозда ўлчовлик сўзлардан иборат эди. — А. Қодирий, Ўтган кунлар

2. Ёзувда ишлатиладиган график белгилар; ҳарфлар тизими.

Арабча хат. Лотин хатини ўрганмоқ.

3. Бирор хабар бериш ёки фикр алмашиш мақсадида аниқ манзилга асосан почта орқали юбориладиган, матн ёзилган қоғоз.

Бир куни почталон Ашурали отага хат тутқазди: — Ўғлингиз Кимсанбойдан. — Т. Ашуров, Оқ от

4. Ҳарфларни ёзишдаги ўзига хос услуб, кўриниш, ёзув хили.

Унинг хати хунук.

[Асар] Жуда сифатли новвотранг қоғозга настаълиқ хатида кўчирилган. — УТА

5. Савод; ҳарф таниш.

[Имом:] Тўғрисини айцак, хатимиз ёʻқ ҳисобида! — Ҳамза, Бой ила хизматчи

Уста Мўмин, раҳматлик, хат билар эди, китоб кўриб, боланинг отини Ёдгор қўйди. — А. Қаҳҳор, Асрор бобо

6. Расмий қоғоз, ҳужжат.

Бунга ташкилотлар ва шахслар ўртасидаги расмий ишга тааллуқли бўлган хатлар, ёзишмалар киради. — ЎТА

7. Сатр, мисра.

Билиш учун ҳар қайси шеърдан бир-икки хат ўқиб кўриш керак эди. — А. Қаҳҳор, Сароб

от Украина, Белоруссия ва Жанубий Россия қишлоқларидаги деҳқонлар яшайдиган уй.

Унда хатамиз ҳув дарё бурилган жойда, ўрмон ёқасида эди. — Р. Файзий, Кишиларимиз қиссаси

Хаталардан бирида тунни ўтказдик. — Шарқ юлдузи

Хусусий аксиядорлик тижорат банки

сфт. 1. Ҳисоблаш, ёзиш, ўқиш, сўзлаш ва шу кабиларда адашиш, янглишиш, нотўғрилик, қусур.

Имловий хато. Математик хато.

2. Умуман, турмушда, ишда ёʻл қўйилган камчилик, нуқсон, нотўғри хатти-ҳаракат.

Душман сирингни ўғирлайди, Дўст хатонгни тўғрилайди. — Мақол

Аммо муҳаббат жуда ноёб нарса, бу ёʻлдаги хатони ҳеч кечириб бўлмайди! — Мирмуҳсин, Умид

3. Ҳақиқатга тўғри келмайдиган, асоссиз, нотўғри.

Хато ёзмоқ. Хато ҳисобламоқ. Хато сўзламоқ.

Жўрттага хато ўқиб, ўзинг кулдирдинг Ўқи, Раъно. — А. Қодирий, Меҳробдан чаён

4. қ.х. Ердан чиқмай ёки унмай қолган уруғ ҳақида.

Яхши ишланмаган ерга экилган уруғ хато чиқади.

5. Мўлжалга, нишонга тегмаслик.

Ўқ хато кетди.

Ҳеч қайсисининг отгани хато кетмас эди, ҳеч бир душман омон кетмас эди. — Алпомиш