fl. 1. Toʻgʻri-notoʻgʻri, haq-nohaqligini bilish maqsadida koʻzdan, eʼtibordan oʻtkazmoq.
Inshoni tekshirmoq.
Amirzodam, gapim yolgʻon boʻlsa, bugun kechasi tekshirib koʻring. — P. Qodirov, Yulduzli tunlar
Darsimni ham tayyorlab boʻldim. Ana, dadamdan soʻrang: tekshirib koʻrdilar. — S. Zunnunova, Yangi direktor
2. Mohiyatini, haqiqiy holni bilish, aniqlash uchun koʻzdan, eʼtibordan oʻtkazmoq.
Ishga qabul qilishda sinab koʻrish — ishchi yoki xizmatchining unga topshirilayotgan ishga masʼuliyatini tekshirib koʻrishdir. — Gazetadan
Endi ovozini tekshirib koʻraman deyayotganda, telefon jiringladi. — T. Ashurov, Oq ot
3. Ilmiy asosda oʻrganmoq, tahlil, tadqiq qilmoq.
Gulning tuzilishini tekshirmoq. Qonning tarkibini tekshirmoq.
Kichik avtobuslardagi laboratoriyalarda esa suv va tuproq tarkibini tekshirish, klinik tadqiqotlar olib borish mumkin. — Gazetadan
4. Nazorat uchun koʻzdan kechirmoq, taftish, reviziya qilmoq.
Qarorning ijrosini tekshirmoq. Kassani tekshirmoq. Ferma xoʻjaligini tekshirmoq.
— Toʻxta, qayerga borasan? Sen komissiya aʼzosisan-ku. Tekshirishni bitkazganimizdan keyin, aktga qoʻl qoʻyib, soʻngra oʻz ishingga borasan. — S. Ayniy, Qullar