Qidiruv

ot 1. Tekis yuzaga (sirtga) egalik.

Yerning tekisligi. Taxtaning tekisligi.

2. Baland-pasti boʻlmagan tekis yer, tekis maydon.

Roʻparadagi tekislikda rayon daraxtlari qorayib koʻrinar edi. — P. Tursun, Oʻqituvchi

3. fiz.geom. Tekis yuza.

Proyeksiyalovchi tekislik. Qiya tekislikdan jismning tushishi.

4. geogr. Katta balandliklar, togʻlar boʻlmagan, nisbiy tekis boʻlgan yer sathi; okeanlar tubidagi yassi katta maydon.

Oʻshning janubidagi keng tekisliklar, toʻlqinsimon qir va adirlar turli-tuman dala gullari bilan bezangan. — P. Qodirov, Yulduzli tunlar

5. siyos. Har jihatdan tenglik, teng huquqlilik.

Iqtisodiy tekislik.

sft. 1. Yuzida gʻadir-budir, baland-past, oʻnqir-choʻnqir joylari boʻlmagan; silliq.

Tekis taxta. Tekis maydon. Tekis devor.

Kecha qorongʻi va tumanli edi. Keng, tekis koʻchaga uzoqdan chiroqlar tuman ichida xira, sovuq nur sepadi. — Oybek, Tanlangan asarlar

Yoʻl tekis, mashina siljimasdi. — S. Ahmad, Ufq

2. Joylashish, oʻlcham (hajm yoki boʻy) va shu kabilar jihatdan bir xil.

U jilmayganida, qizlarnikiga oʻxshash, tekis tishlari yarq etib ketdi. — Oʻ. Hoshimov, Qalbingga quloq sol

Boʻyi baland, qomati kelishgan, qora soqoli iyagida tekis qilib qirqilgan. — M. Ismoiliy, Fargʻona tong otguncha

Koʻk bluzka kiygan ikki qiz Bashoratlarning oldiga keldi. Ular bir-birlariga juda oʻxshar, boʻylari ham tekis, juda chiroyli qizlar edi. — A. Muxtor, Opa-singillar

3. Bir maromda, bir xil tezlikda.

Tekis harakat. Tekis odim.

Xuddi sirk otlariday bezatilgan semizgina, silliqqina boʻz ot tekis olib ketdi. — Oybek, Nur qidirib

Undan nariroqda qora kalxat, sanʼatini namoyish qilayotganday, bir tekis suzib yuribdi. — N. Fozilov, Diydor

4. rvsh. Baravariga, yoppasiga bir vaqtda; shigʻa, qiygʻos.

Urugʻlarni tekis undirib olmoq. Giloslar bir tekis gulladi. Gʻoʻzalar bir tekis unib chiqdi.

Har safar tekis chiqib, yashnab oʻsayotgan yam-yashil gʻoʻzalarni koʻrganimda paxtazordan chiqqim kelmas edi. — O. Yoqubov, Ikki muhabbat

5. Har jihatdan teng, baravar, bir huquqdagi.

Suv xudoyimning mulkimi? Xaloyiq tekis ichadi. — Oybek, Tanlangan asarlar

Meni saylang, negakim, Endi qadrdon boʻla-man. Bir tekis hammangizga Xizmati bajon qilaman. — Hamza

6. koʻchma s.t. Beishkal, silliq; bir xil qilib.

Ishi juda tekis. Hamma ish tekis boʻlib ketdi.

Musa koʻsa bir yerda turmas, chigitlarni bir tekisda ekish kerakligini, chigit toʻrt enlikdan chuqur boʻlmasligini hadeb tayinlardi. — S. Ahmad, Hukm

7. s. t. Kelishgan, chiroyli.

Oʻrtada oʻn olti-oʻn yetti yashar bachcha oʻynaydi. U rang-siz, xipcha, tekisgina, yana toʻgʻrirogʻi, popukday bola. — Oybek, Tanlangan asarlar

Anov togʻ bilan manov togʻ egiz ekan, Jami qizdan oxun qizi tekis ekan. — Oq olma, qizil olma

ot Hamma narsani tenglashtirish tarafdori.

ot 1. Tekis, birday emaslik; har xillik.

Harakatning notekisligi.

2. Notekis, past-baland yer, joy.

Notekisliklarni toʻgʻrilamoq.

fl. 1. Baland-past, gʻijim, gʻadir-budurlarini yoʻqotib, tekis, silliq qilmoq.

Yerni tekislamoq. Koʻchani tekislamoq. Taxtani tekislamoq. Sochini tekislamoq.

Nodira boshliq bir toʻda oʻquvchilar sport maydonchasini tekisladilar. — S. Zunnunova, Yangi direktor

Normat oʻrnidan turib, kamarini qattiq tortib, gimnastyorkasini tekisladi-da, Adolatning oldiga bordi. — I. Rahim, Chin muhabbat

2. Bir chiziq boʻylab tekis joylashtirmoq.

Saflarni tekislamoq.

Rota komandiri jangchilarga kiyimlarini tuza-tishni, qurollarni yana qayta tekislab, tartibga solib qoʻyishni buyurdi. — Shuhrat, Shinelli yillar

3. s. t. Ishkallarni yoʻqotib silliqlamoq, toʻgʻrilamoq.

Hamma ish tekislab yuborildi.

ot 1. Bajarilgan ishning miqdori va sifatini hisobga olmasdan, hammaga bab-baravar haq toʻlash, bir xilda toʻlash, taqdirlash.

Tekischilikka qarshi kurash.

Shukurjon tekischilikka qarshi murosasiz kurash olib borar, biron yosh tabelchiga naryadni boshqatdan ishlash uchun qaytarib berar ekan: — Shuni bilib qoʻyingki, hech qachon hamma bir xilda ishlamaydi, — derdi. — Z. Sotiyev, Isteʼdod

Bu sohada [moddiy ragʻbatlantirishda] yuz berib kelayotgan tekischilikka qatʼiyan barham berish kerak. — Gazetadan

2. siyos. Kishilarni, qaysi sinf yoki tabaqaga mansubligidan qati nazar, iqtisodiy va siyosiy jihatdan teng imkoniyatli, teng huquqli qilishga urinish.