Qidiruv

sft. 1. Uncha kuchli, shiddatli boʻlmagan; sekin, past.

Sust oqim. Sust olov.

Tez maslahat yovning boʻynin egdirur, Sust maslahat bul oʻljadan qoʻydurur. — Gulixiromon

Ertalab turib, gazeta varaqlashga yuragim dov bermaydi. Nega qoʻrqaman, nimaga ishonchim sust? — A. Muxtor, Asarlar

2. Sekin ish qiladigan, kamfaol, imillagan; sustkash.

Sust odam. Bozor sust. Kuli sust kosibdan oyogʻi chaqqon gadoy yaxshi. — Maqol

Omborxonalar taʼminoti sust amalga oshirilyapti. — Gazetadan

3. Lanj, boʻshashgan.

Daʼvogar sust boʻlsa, qozi muttaham boʻladi. — Maqol

ot 1. Shashti pastlik, gʻayratsizlik; kuchsizlik; lanjlik.

Yigitlik — mastlik, qarilik sustlik. — Maqol

Yusufbek hoji oʻgʻlining bu sustlikka oʻxshab koʻringan holini yomonga yoʻydi. — A. Qodiriy, Oʻtgan kunlar

2. Sust odamlarga xos xatti-harakat, sust ish; sustkashlik.

Oʻrtoqlar ishga kelganda, sustlik, hafsalasizlik qilishdi. — Oybek, Oltin vodiydan shabadalar

sft. Sekin qimirlaydigan, imillab ish qiladigan; sust, lanj.

Sustkash odam. Sustkash usta.

fl. Sust boʻlib qolmoq, sekinlamoq, pasaymoq, susaymoq.

Sultonali bir oz sustlanib, oʻzidan oʻn ot odimi yiroqqa borgan tunqotarni chaqirib toʻxtatdi. — A. Qodiriy, Mehrobdan chayon

ot 1. Sust boʻlishlik, imillashlik, boʻshashganlik, lanjlik.

[Ali tajang] Elatlari qoshiga kelib yonboshlagach, uning eski sustkashligi toʻgʻrisida hazil qilishdi. — Oybek, Quyosh qoraymas

Qiyinchiliklarni bahona qilib, sustkashlik qilsak, katta mehnat evaziga yetishtirilgan hosilni boy berib qoʻyishimiz mumkin. — Gazetadan

2. Sustkash odamlarga xos xatti-harakat, sust ish; sustlik.

fl. 1. Tobora susayib, sekinlashmoq, pasaymoq.

Ish sustlashdi.

— Diyora, — murojaat qildi Jonibek negadir tobora qadam olishi sustlashib. — Sharq yulduzi

Ismi tilga olinishi bilan Ajabning nafas olishi sustlashdi. — Sharq yulduzi

2. ayn. Boʻshashmoq II 6.

[U] Intizomning sustlashib ketayotganini, bunga baʼzi komandirlarning oʻzlari ibrat koʻrsatayotganlarini soʻzladi. — Shuhrat, Shinelli yillar