Qidiruv

fl. 1. Supurgi bilan chang-toʻzon, axlat va shu kabilardan tozalamoq, axlat va shu kabilar narsalarni sidirib olmoq, toʻplamoq.

Uy supurmoq. Hovli supurmoq. Yangi supurgi toza supurar. — Maqol

Oʻnlab farroshlar hafsala bilan yer supurgan, meshkobchilar etaklarini belbogʻga qistirib, suv sepgan — S. Siyoyev, Avaz

2. koʻchma Tag-tomiri bilan sidirib, oradan koʻtarmoq, surmoq.

Yulgʻichlarni oramizdan supurib tashlash kerak.

3. koʻchma Yoʻq qilmoq, yoʻqotmoq, barham bermoq.

Gul bogʻlarga yellar koʻklam nafasini ufurdi. Yerdan qor-u moviy koʻkdan bulutlarni supurdi. — E. Vohidov

ot 1. Supurish-sidirish, tozalash uchun burgan, shuvoq, makkasupurgi va shu kabilardan dastalab bogʻlab yasaladigan roʻzgʻor buyumi.

Shuvoq supurgi. Choʻltoq supurgi.

U taxmondagi, shiftlardagi islarni supurgi bilan olib, polni ikki qayta yuvdi. — Mirmuhsin, Umid

Yangi supurgini ishlatishdan oldin sovunli qaynoq suvda hoʻllab olsangiz, koʻpga chidaydi. — Saodat

2. bot. Choʻl, qirda oʻsadigan sershox, urugʻi zaharli bir yillik oʻsimlik.

3. ayn. Makkasupurgi.

ot 1. Supurganda toʻplangan axlat.

Supurindilarni yerga toʻplab yoqmoq.

Bu yerga yozda supurindi, qishda qor tashlaydilar. — Oydin, Hazil emish

2. koʻchma nafr. Odamgarchiligini yoʻqotib, kishilardan ajralib qolgan, maishiy yoki mafkuraviy jihatdan tuban kishi.

ot Supurgi bogʻlab sotuvchi kishi.

Mana Barat supurgichi! Bozordan supurgisini chaqa qila olmay, yana orqalab qaytayotir. — Oybek, Tanlangan asarlar

fl. Supurmoq feʼlining majhul nisbati.

ot Supurmoq feʼlidan sifatdosh.