Қидирув

фл. 1. Кийим билан баданни ёки бирор аъзосини ёпмоқ; кийиладиган нарса (кийим)ни танага, танадаги аъзога ёпмоқ, қўймоқ, илмоқ.

Кўшак киймоқ. Дўппи киймоқ. Этик киймоқ. Палто киймоқ. Ниқоб киймоқ. Қўлқоп киймоқ.

Қиз тугунини қўлтиқлаб, ҳовлига тушди. Кавушини киймади. Яланг оёқ шип-шип юриб кетди. — Ойбек, Танланган асарлар

Ғуломжон апил-тапил кийимларини кийди, оёқларига ковушларини илди шарпасиз қадамлар билан дарча олдига келди. — М. Исмоилий, Фарғона тонг отгунча.

2. этн. Ҳадя кийими олмоқ.

Шармсиздир юзлари, Ошга тўймас кўзлари, Тўйга бориб, тўн киймоқ Ҳамон фикр-у сўзлари. — Ҳамза

3. кўчма Ўранмоқ, қопланмоқ, бурканмоқ (ўт-ўлан, гул ва шу кабилар билан).

Баҳорнинг дастлабки кунлари: қишлоқ яшил либос кийган. — Н. Сафаров, Хадича Аҳророва

Дунёни гулларнинг хушбўй ҳиди тутади, гулшан-у боғлар қизил сарпо киядилар. — Газетадан

фл. 1. Киймоқ феълининг ўзлик нисбати.

Кийинаётиб, столдаги графиннинг тагига қистирилган бир парча қоғозга кўзим тушди. — О. Ёқубов, Бир фелетон қиссаси

2. Маълум тарзда кийим кийган ҳолатли бўлмоқ.

Иссиқ кийинмоқ. Юпун кийинмоқ. Олифта кийинмоқ.

Ҳар доим яхши кийиниб, кеккайиброқ юрадиган бу чиройли, қоратўри йигит ўқитувчи Каримов эди. — П. Турсун, Ўқитувчи

Бироқ бугун одатига хилоф равишда кийинган: эгнида ҳаворанг мовут чакмон, оёғида ҳам сахтиён маҳси — С. Сиёев, Аваз

Кийинишидан нозик табиатлиги, баланд дидлиги кўриниб турарди. — Шуҳрат, Шинелли йиллар

фл. Кийинмоқ феълининг биргалик нисбати.

фл. 1. Кийинмоқ феълининг орттирма нисбати.

Ўғлини кийинтирмоқ.

2. Кийим-бош, кийим-кечак билан таъминламоқ.

Фуод афанди бир ярим йилдан бери уни [Ҳожи қизни] боқар, ичирар, кийинтирар лекин пул олмас эди. — М. Исмоилий, Фарғона тонг отгунча

Худога шукур, бойларимиз орасида саховатли одамлар ҳам бор. Улар фақирларга закот берадилар, яланғочларни кийинтирадилар. — Ойбек, Танланган асарлар

фл. Кийинтирмоқ феълининг мажҳул нисбати.