Қидирув

от 1. Ҳарбий саф ёки колонна ва унинг қўмондонга қараб турган олд томони.

2. Жанг ҳаракатлари бўлаётган ҳудуднинг, майдоннинг душманга қараб турган олд томони, жанг майдони.

Дадамат ака, башарти уруш бошланиб қолса, ўша заҳотиёқ қўлига қурол олиб, фронтга жўнайди. — Ф. Мусажонов, Ҳиммат

Онанинг уч ўғли — кўзининг оқ-қоралари фронтдан қайтмади. — Гулдаста

3. Бевосита уруш, жангнинг ўзи.

Фронт Бектемирга дастлаб унча ваҳимали кўринмади. — Ойбек, Қуёш қораймас

4. Уруш вақтида ҳаракатдаги армиянинг бир қўмондон раҳбарлиги остидаги энг йирик гуруҳи — олий оператив-стратегик бирлашма.

Украина фронти. Жанубий фронт.

Мирзаев Ғарбий фронтнинг ўзида учта хат, иккита совға олган эди. — А. Қаҳҳор, Кўк конверт

5. кўчма Оммавий ҳаракатлар майдони, шунингдек, бирон-бир иш, фаолият соҳаси. Меҳнат фронти.

Мудҳиш уруш — қон тўкиш тўхтатилди. Тинч меҳнатда тер тўкиш фронти бошланди. — Н. Сафаров, Оловли излар

Бу ер фронт! Пахта фронти! Дангасалик қилган одам шафқат кутмасин. — Ў. Ҳошимов, Қалбингга қулоқ сол

Сигналнинг бошланғич даражасидан максимал қийматигача ошиб бориши ёки максимал қийматдан минимал қийматгача пасайиб бориши юз берадиган импулс участкаси.

Фазонинг бир хил фазали нуқталаридан ўтадиган ва ҳар бир нуқтада тўлқин ёʻналишига перпендикуляр бўлган сирт.

от Фронтда хизмат қилаётган ёки уруш маҳалида фронтда, ҳаракатдаги армияда бўлган киши.

Йигитча фронтчи акасининг келишидан, уйи тўлиб қолишидан қувончи ичига сиғмас эди. — С. Аҳмад, Уфқ

от Бир фронтда бирга хизмат қилган.

Фронтдош дўстлар хат орқали ўзаро алоқа боғлаб туришарди. — Газетадан