1. Nihoyat kam uchraydigan; boshqalarga oʻxshamagan; kutilmaganda yuz bergan; tasodifiy.
Favqulodda hodisa.
Otning kavsh qaytarishi favqulodda yerda, favqulodda vaqtda kechadi. — T. Murod, Ot kishnagan oqshom
Zamiraning Muhammadjonga unashtirilgani hali ham odamlarga favqulodda bir yangilik boʻlib koʻrinardi. — P. Qodirov, Uch ildiz
2. Odatdan tashqari; kam duch kelinadigan, kamyob.
Tiktepa qishlogʻining guzarida mulla Obidning qoʻlidagi favqulodda ketmonni koʻrgan har kim kuladi. — A. Qodiriy, Obid ketmon
Oybek favqulodda serqirra isteʼdod sohibi edi. — Gazetadan
3. rvsh . Gʻoyat darajada, haddan tashqari; gʻoyat, juda.
Sheralining nazarida, bugun hamma narsa favqulodda soʻlim, qushlarning nagʻmasi esa jozibaliroq edi. — S. Karomatov, Oltin qum
Nikoh toʻyi favqulodda suronli va tantanali boʻldi. — Oybek, Tanlangan asarlar
4. Maxsus sharoit talabi bilan belgilanadigan, sodir boʻladigan; navbatdan tashqari.
Favqulodda majlis. Favqulodda va muxtor elchi.
Bu hodisalar saroyda favqulodda chora-tadbirlar koʻrishni taqozo etdi. — Mirmuhsin, Meʼmor