«bulgʻashmoq» boʻyicha 12 ta natija: Oʻzbekchadan
fl. Bulgʻamoq feʼlining oʻzlik nisbati.
fl. 1. Biror narsani iflos, kir narsaga belamoq, botirmoq, hamma yogʻini iflos qilmoq.
Eshakni siylasang, oxurini bulgʻar. — Maqol
Oyogʻi iflos toʻr bulgʻar, Oʻzi iflos el bulgʻar. — Maqol
Ifloslangan oqar suvlar sizib oʻtib, yer osti suvlarini bulgʻamoqda. — Fan va turmush
2. koʻchma Badnom qilmoq; haqoratlamoq.
Marahim haqida soʻz ochdilar, uning arvohini bulgʻadilar. — Sh. Rizo, Qor yogʻdi, izlar bosildi
Nega u pashshaxoʻrda boʻlib qoldi desam oʻz nafsini koʻzlab, vijdonimni oʻz shaltogʻiga bulgʻab, shirin turmushimni buzmoqchi ekan. — S. Yunusov, Oson ishning ohi bor
Nomini bulgʻamang! Sherbek akam tilla yigit. — S. Anorboyev, Oqsoy
Podaning ichida bitta tirraqisi boʻlsa, hammasini bulgʻaydi. — S. Zunnunova, Olov
3. Loyqatmoq, loyqa qilmoq.
Suvni bulgʻamoq.
4. shv. Qoʻl bilan imlamoq.
Oʻtiribdi ayvonchada azonda, Alin bulgʻab, qichqiradi xirmonda. — Qoʻshiqlar
5. Belamoq, bulamoq, botirmoq.
Raʼno ayvon labida qoʻlini kerosinga bulgʻab, lampa yoqish harakatida edi. — H. Nazir, Soʻnmas chaqmoqlar
Homid nonni shinniga bulgʻar ekan, soʻradi: — Yoshingiz nechada, bek? — A. Qodiriy, Oʻtgan kunlar
6. Buzmoq, isnod keltirmoq.
Endi ular [bolalar] battar boʻlsa boʻladiki, yaxshi tomonga oʻzgarmaydi. Jamiyatni bulgʻab yashayveradi. — Yoshlik
Lekin siz bilan tom maʼnodagi tilanchilar, taʼbir joiz boʻlsa, jamiyatimizning koʻrkam jamolini bulgʻab turgan oʻsha soʻgallar, husnbuzarlar haqida gaplashmoqchiman. — Gazetadan
7. koʻchma Zoʻrlamoq, nomusiga tegmoq.
Oʻsha buvaydalik Saidahror eshon oʻn bir yashar qizni bulgʻagan, sharmanda boʻlishdan qoʻrqib, uni boʻgʻib oʻldirgan ekan. — A. Qahhor, Qoʻshchinor chiroqlari
sft. Bulgʻangan, iflos; loyqa.
Hovli yuzi turli axlatlar bilan bulgʻanch, goʻyo yillardan beri tozalanmagan, supurgi koʻrmagandek edi. — A. Qodiriy, Oʻtgan kunlar
fl. 1. Bulgʻamoq 1, 2, 5 feʼllarining majhul va oʻzlik nisbati.
Loyga bulgʻanmoq. Oʻz shaltogʻiga bulgʻanmoq.
Bulgʻanish boʻlsa, shaʼnim bir marta bulgʻangan. Menga muruvvat qilmay qoʻya qoling. — S. Anorboyev, Mehr
Yigitlar qoʻylarning siydik va tezaklariga bulgʻanib yotgan tutqunlarning qoʻl-oyoqlarini yechib, qoʻradan haydab chiqarmoqchi boʻldilar. — S. Ayniy, Qullar
2. fiziol. Ixtilom boʻlmoq.
fl. 1. Bulgʻamoq 1, 3, 6 feʼllarining orttirma nisbati.
Olti yildan beri qancha pok yostiqlarni bulgʻatmadi Fuod afandining bu uchirmasi. — M. Ismoiliy, Fargʻona tong otguncha
2. ayn. Bulgʻamoq 1, 2, 3.
Oʻzbeklar aytadi: Iflos buzoq podani bulgʻatar. Oybek, Quyosh qoraymas. Tuz ichib, tuzligʻimni bulgʻatib ketmoqchimisan?! — M. Boboyev, Goʻzallik istab
bir kuni ikki yasovul chashma boshida: Sen, yaramas kelgindi, suvni bulgʻatding, deb qamchi bilan /meshkobchini] chunonam savalashdi. — Mirmuhsin, Meʼmor
fl. 1. ayn. Bulgʻamoq.
Shokir kuchliroq boʻlgani uchun bir chalishda uni [Sattorni] agʻdarib yiqitdi va to uzoqdan oʻqituvchilari koʻringuncha tuproqqa bulgʻalab turdi. — Oʻ. Umarbekov, Qismat
2. Qoʻlini koʻtarib, havoda muallaq aylantirmoq.
Bir qoʻlini koʻtarib bulgʻalab, hadeb chaqiraverdi. — Ravshan
Meni koʻrib, masti beixtiyor boʻlib, ikki qoʻlini koʻtarib, bulgʻalab qizlarni chaqirib, bir soʻz aytdi. — Ravshan
