fl. 1. Yoyiq, chochiq narsalarni bir joyga toʻplamoq; yigʻmoq.
Baʼzilar zinalarga sochilib qolgan gʻisht boʻlaklarini, kesaklarni darhol yigʻishtirib olib tashlardilar. — Mirmuhsin, Meʼmor
Solih ish vaqti tugashiga ikki soat qolganda narsalarini yigʻishtirdi. — O. Moʻminov, Xiyobondagi uch uchrashuv
2. Yigʻib-terib olmoq, (dehqonchilik, dala mahsulotlari haqida).
Aql-zakovat bilan ish tutib, terimni nechogʻliq tezlashtir-sak, hosilni shuncha tezroq yigʻishtirib olamiz. — Gazetadan
Dehqonning oltinpazi paxta teradi, sohibkori uzum uzadi, qovunchisi poliz yigʻishtiradi, molboqari xashak jamgʻaradi. — Gazetadan
3. Jam holga keltirmoq.
Koʻchlaringni yigʻishtir! Aravani qoʻsh! Quvaga joʻnagaymiz. — P. Qodirov, Yulduzli tunlar
4. Ishlatilgan, foydalanilgan narsalarni yotgan (turgan) joyidan yigʻib olmoq, oʻrin-joyni tartibga keltirmoq, tozalamoq, saranjom-sarishta qilmoq.
Otabek kirgizilgan Hasanalining uyi Oybodoq ona tomonidan tozagina yigʻishtirilib asbob-jihozlar bilan ziynatlangan edi. — A. Qodiriy, Oʻtgan kunlar
Tashqari hovlida hamma uylarni yigʻishtirdim, koʻrpachalarni hovliga olib chiqib qoqdim. — Oybek, Tanlangan asarlar
U yoq-bu yogʻingni yigʻishtir, mehmon keladi. — S. Zunnunova, Yangi direktor
5. Tartibli holatga solmoq, epaqaga keltirmoq (oʻzini yoki oʻzidagi biror narsani).
Boshyalang, sochini yaxshigina yigʻishtirib qoʻygan. — Oydin, Hikoyalar
Juvon roʻmolini olib oʻradi, etaklarini yigʻishtirib oʻrnashib oʻtirdi. — A. Qahhor, Qoʻshchinor chiroqlari
Qachondan beri sipo boʻlib qolding? Qizlardan gap ketsa, ogʻzingni yigʻishtirib ololmasding-ku! — Shuhrat, Shinelli yillar
6. Bas qilmoq, barham bermoq.
Men shotida oʻtirib kitob oʻqishni ham, ovga chiqishni ham yigʻishtirib qoʻydim. — Sh. Xolmirzayev, Yoʻllar, yoʻldoshlar
Ahmad ish topishdan umidini uzib, redaksiyalarga uchrashni yigʻishtirib qoʻydi. — F. Musajonov, Himmat
- Dov-dastgohni yigʻishtirmoq
- Taxta-oʻqlogʻini yigʻishtirmoq Biror ish-faoliyatni toʻxtatmoq. Povurkon (fabrika) mollari hamma yoqni toʻldirib, kosiblarning bozorini kasod qilganligi, ishi chippakka chiqqan kosiblar birin-ketin taxta-oʻqlogʻini yigʻishtirayotganligini tasvirlab ketdi. — Oybek, Tanlangan asarlar
- Esini (yoki es-hushini) yigʻishtirmoq Es-hushini joyiga keltirmoq, fikr-xayolini toʻgʻri yoʻlga solmoq. Hamza es-hushini yigʻishtirib olib, qogʻozni buklogʻidan yozdi-da, unga koʻz yugurtirib, shu soʻzlarni oʻqidi — K. Yashin, HamzaYolgʻizjon avval gumburlagan ovozni eshitdi esini yigʻishtirishga urindi, ammo madori yetmadi. — R. Rahmon, Mehr koʻzda
- Es borida etakni yigʻishtirmoq (yoki yopmoq) Es borida, oʻz vaqtida aybli (nomaqbul) ishlarga barham bermoq. Shuni bilib qoʻyingki, ishlaringizning oxiri voy! Tezda etagingizni yigʻishtirib oling! — H. Gʻulom, Toshkentliklar