Qidiruv

ot 1. Mashina yoki qurilmalarning yuk koʻtaruvchi, ularni tutib turuvchi asos qismi.

Avtomobil ramasi.

Katta diametrli truba tarzidagi rama mashina asosini tashkil etgan. — Fan va turmush

2. Bir-biriga biriktirib mahkamlangan chorqirra yogʻoch yoki temir moslama.

Stanok ramasi.

3. Derazaning oyna solingan yoki solinmagan har bir qanoti.

ot 1. Biror gʻoya, tushuncha, hodisa kabilarni ifodalovchi, eslatuvchi shartli belgi, ishora.

Doʻstlik ramzi. Kabutar — tinchlik ramzi.

Ona oʻlkam mening ramzi sadoqat, Durlar shodasida durdona goʻyo. — E. Vohidov, Muhabbat

Sanʼatkor Bernora, moviy koʻl farzandi, sadoqat ramzi — Oqqushga aylanib, ravon suzib chiqadi sahnaga. — Saodat

Yodgorliklar muqaddas nodir meros sifatida Vatanga sadoqat ramzi boʻlib, avloddan avlodga oʻtib boradi. — N. Safarov, Olovli izlar

Biz, ozod Oʻzbekiston fuqarolari uchun mustaqillikning muqaddas ramzlari — Davlat gerbi, Davlat madhiyasi azizdir. — Gazetadan

2. Qochiriq yoki ishora bilan aytilgan gap; imo-ishora, shama.

Ramz bilan gapirmoq.

Latifa, askiya, ramz-u kinoya Oʻtar ulfatlar ichra benihoya. — Habibiy

Saidiy, garchi keyinchalik Yoqubjonning ramziga tushungan boʻlsa ham, bu gapni haqoratga qarshi haqorat tarzida aytdi. — A. Qahhor, Sarob

Hasrat toʻla soʻzingdan ozor topar nigorim, Ramzi ishora birlan qilgin uni ifoda. — E. Vohidov, Yoshlik devoni

3. Ramz (erkaklar ismi).

ot 1. Portret, rasm va shu kabilar solinadigan, karton, metall va boshqalar materialdan qilinadigan, aso-san, toʻrt burchakli hoshiya.

Jimgina xona billur qandildan yogʻilayotgan nurga toʻlgan, devorlardagi keksa artistlarning suratlari solingan ramkalar oynasi yaraqlab turardi. — Oʻ. Hoshimov, Qalbingga quloq sol

Buguncha asliga oʻxshasa surat, Zarrin ramkalarga quvnab solgaysiz, Yuz rangda tovlanib kelganda shuhrat, Suvratin chizolmay shoshib qolgaysiz. — A. Oripov, Yillar armoni

2. Matn yoki rasm atrofiga chizilgan toʻgʻri toʻrtburchak qora hoshiya (motam, aza bilan bogʻliq).

Marhumning suratini yoki nomini ramkada bermoq.

3. koʻchma Ish-harakat, faoliyat, voqea-hodisa kabilar doirasi; chek, chegara.

Ramkaga solmoq. Ramkadan chiqarmoq.

Furqat yubileyi oʻzining salmogʻi, mohiyat eʼtibori bilan adabiyot hodisalari ramkasidan tash-qariga chiqib ketadi, keng maʼnodagi madaniyatimiz, maʼnaviy hayotimiz taraqqiyoti masalasiga aylanib ketadi. — OʻTA

sft. Ramasi bor; rama oʻrnatilgan.

ot Nihoyat darajada ozgan, holdan toygan, eti borib suyakka taqalgan.

U ramaqi boʻlib qolibdi.

Ne uqubatlarni koʻrib, bahorga chiqding ramaki, Qovurgʻalaring sanalib, qoq qurib jiring, sigirim. — Mushtum

sft. 1. Ramzdan iborat boʻlgan; ramzli, ishorali.

Yoʻlning ham, manzilning ham oʻz ramziy maʼnosi bor. — H. Gʻulom, Senga intilaman

Buyuk odamlar tirikligida oʻzidan nishona bermaydi. Ularda ramziy holat koʻproq boʻladi. — S. Karomatov, Soʻnggi barxan

2. Rasmiyat uchun qilingan, yuzaki, shunchaki.

Biz yadro qurolidan xoli Markaziy Osiyo zonasining barpo etilishi ramziy tadbirga aylanib ketmasligi kerakligini yaxshi bilamiz. — Gazetadan