рвш. 1. Эрта тонг ёки шомда нарсалар аниқ кўринмайдиган пайт; ҳавонинг эрта тонгда ёришиб келаётган, кечқурун қоронғилашаётган ҳолати; ёруғлик ёки қоронғиликнинг кучсиз ҳолати.
Ғира-шира ёруғ. Ғира-шира қоронғи. Ғира-шира хона. Ғира-шира пайт.
Эъзозхон бугун уйдан ҳар кунгидан эртароқ — тонг ғира-ширасида, нонушта қилмасданоқ чиқди. — Ҳ. Ғулом, Машъал
Ҳозир ғира-ширада уларни бир-биридан ажратиш қийин. — С. Анорбоев, Оқсой
Ғира-шира кўчалар, гузарларда қандайдир қора соялар кўзга чалинарди. — О. Ёқубов, Кўҳна дунё
2. Нарсанинг кўриш ёки тасаввурдаги аниқ-равшан бўлмаган, хира аксини билдиради.
Гавҳар унинг қоронғида ғира-шира кўриниб турган меҳрибон чеҳрасидан бу сафар ҳам илтимосини ерда қолдиролмаганини тушунди. — Ў. Ҳошимов, Қалбингга қулоқ сол
Ёшлик! Бу йилларда ҳаётингизда бўлиб ўтган воқеалар тушда кўргандай ғира-шира эсда сақланади. — С. Кароматов, Лирика бастакори
Ёш палламда дадам, аям билан бирга шаҳардаги ҳовлимизга келганим ғира-шира ёдимда. — Ойбек, Танланган асарлар