jirov. Qozoq, qirgʻiz va qoraqalpoq xalqlari orasida katta epik asarlarni aytuvchi baxshilar shu nom bilan yuritiladi. Jirovlar juda katta isteʼdodga ega boʻlib, ular toʻxtovsiz bir necha kun davomida katta-katta xalq dostonlarini kuylab berishdan tashqari, oʻzlari ham ijod qilganlar. Jirovlar ham, oʻzbek baxshilariga oʻxshab, ustoz-shogirdlik munosabatlari asosida yetishib chiqqanlar. Hozir jirov termini koʻproq qoraqalpoqlar oʻrtasida qoʻllaniladi. Mashhur qozoq jirovlaridan Sipara jirov, Shalgaz jirov va boshqalar ajoyib asarlar qoldirdilar. Qoraqalpoq jirovlaridan: Qurbonboy Tojiboyev, Yesemurod Nurabullayev, Qulamet Ubbiyev, Xojambergen Niyozov, Qiyas Xayritdinov va boshqalar qoraqalpoq xalqining juda qadimiy xalq eposini hozirgi kunga qadar yetkazib berdilar.
Qidiruv
«жир» boʻyicha 1 ta natija: Qozoqchadan