Қидирув

от 1. Жинсий ва жисмоний жиҳатдан вояга етган эркак.

Уларнинг бири йигирма ёшлардаги қотма, хипча йигит эди. — И. Раҳим, Чин муҳаббат

2. Умуман, ёш эркак, ёш киши.

Мана шу ерда МЦ ташкил қилинди-ю, бунга ўша пахта заводида ишлайдиган бир йигит каттакон бўлиб келди. — А. Қаҳҳор, Қўшчинор чироқлари

3. кўчма Эр киши, жасур одам, мард.

Йигит сўзидан қайтмас, арслон — изидан. — Мақол

Эр йигит бошига иш тушганда синалар. — Мақол

Йигитнинг моли ерда. — Мақол

4. с. т. (эгалик қўшимчаси билан) Қизнинг кўнгил қўйган кишиси, севгилиси.

Ҳой, менга қара, сенингча, йигити бор қиз биров билан гаплашмайдими? — Шуҳрат, Шинелли йиллар

5. Бирор ҳарбий тўдага, гуруҳга мансуб бўлган эркак киши.

Орадан уч-тўрт дақиқа ўтгандан кейин, Камолон тарафидан бир юз чамалик саркарда ва йигитлари билан Азизбек кўринди. — А. Қодирий, Ўтган кунлар

6. Ўзига нисбатан ёши кичик кишига мурожаат қилишда қўлланади.

Йигит, бу ёʻл қаёққа олиб боради?

Ҳай, ўт йигит, ҳалиги сўзларинг олтинга арзийди — Ойбек, Танланган асарлар

от Йигит сингари, йигитга хос, йигитдек; мардона.

Бир йигитча иш қилмоқ.

Қиз тўн, дўппи кийиб, белбоғ боғлаб, йигитча ўйинга тушди.

от 1. Эр жинсидаги шахснинг балоғатдаги даври, балоғатга етган даври.

У йигитлигини дарбадарликда ўтказиб, Андижондан Бухорогача пиёда кезган барча катта-кичик тоға деб ҳурматлайдиган Юсвали чол эди. — П. Турсун, Ўқитувчи

Ёш-сан, соғсан, ишла, ўйна, улфат қур, ҳар бир шўхлик йигитликда ярашади, болам. — Ойбек, Танланган асарлар

2. Шахснинг балоғатга етган, йигит даврига хос.

Йигитлик ғурури.

Оғир, вазмин йигит. Офтоб тиғида қорайган билакларидан йигитлик кучи ёғилиб турибди. — М. Ҳазратқулов, Журъат

Йигитликнинг шўх ҳаваслари юракда бир лаҳза чайқалиб кетди. — Ойбек, Танланган асарлар

3. Йигитга хос мардлик, довюраклик, жасурлик.

— Жуда яхши, жуда соз бўпти, асл йигитлик қилибсиз — деди Элмурод. — П. Турсун, Ўқитувчи

Унинг йигитлигига тилда таҳсин ўқиб югуриб келаётганим-да, бек ака. — А. Қодирий, Меҳробдан чаён

4. айн. Йигитчилик.

Сен ҳали ёшлик қиласан. Йигитлик эмиш. Шу ҳам гап бўпти-ю. — Ойбек, Танланган асарлар

от эск. Бирор ҳарбий тўда ёки гуруҳга (йигитларга) бош киши, бошлиқ.

Жаноблари Раҳмонқул қўшинини ўз ҳимояси ва идорасига олдилар. Энди унга сиз каби, Комил афанди каби йигитбошилар керак. — Ҳ. Ғулом, Машъал

от Йигитликда бўладиган хатти-ҳаракат, юриш-туриш.

— Бўлғуси қайнатамизнинг кичкина боғлари бор эди. Йигитчилик экан-да, бозор куни ғира-шира маҳалида уч пахса девордан ошиб тушдим, — деди чол. — П. Турсун, Ўқитувчи

Йигитларга хос, мардона, мардонавор.

Йигитларча ишламоқ.