Qidiruv

ot 1. Issiqlik manbai yoki qizib turgan narsadan urayotgan issiq, harorat.

Tandirning tafti. Olovning tafti. Gulxan taftida isinmoq.

Kech kirib, havoning tafti qaytdi. — S. Ahmad, Qadrdon dalalar

Moviy osmon tiniq va begʻubor, hali taxtga minmagan quyoshning tafti badanni kuydirmaydi. — F. Musajonov, Himmat

2. Issiqlikdan koʻtarilayotgan bugʻsimon narsa; hovur.

Egatlardan jimir-jimir taft koʻtariladi. Qushlar koʻrinmaydi. — S. Nurov, Narvon

3. koʻchma Shaxs yoki narsaning harorat darajasi holati; temperatura.

Suvning taftini bilgisi keldi shekilli, gʻoʻdir barmoqlarini botirdi. — R. Rahmonov, Vosil aka

Shu tariqa tajriba ham toʻplana bordi, choʻl yerlarining tafti, maromini ham oʻrganib olishdi. — Gazetadan

4. koʻchma Ijobiy taʼsirli, hayotbaxsh harorat, oʻt.

Hovlida odam borki, jon bor. Devordan tortib dov-daraxtgacha oshxonadan tortib donxonagacha, roʻzgʻor buyumlarigacha — bari odam tafti bilan tirik. — R. Fayziy, Hazrati inson

Bu satrlarning taftidan Zuhra begimning qalbiga yana issiqlik yugurdi. — P. Qodirov, Yulduzli tunlar

5. koʻchma Kishi ruhidagi yoqimsiz holat, gʻubor.

Ovqatdan oldin yuvinib chiqasizmi — sovuq suv odamning taftini bosadi. — A. Qahhor, Ayajonlarim

Odam taftini odam oladi, deganlari shu-da, inim. — R. Rahmon, Mehr koʻzda

Diqqati oshib, dili qorongʻi boʻlib ketgan kezlarida chelakni shaftoliga toʻldirib, yotogʻimizga kelib qoladi. Bizni koyib-koyib, taftini yozib ketadi. — S. Ahmad, Onajonlar

6. koʻchma Oʻzini yuqori olish, manmanlik kayfiyati.

Halima oʻsha Oyjamol opa kelib ketgandagi mojarodan keyin ancha taftidan tushgan, oʻzgara boshlagan edi. — J. Abdullaxonov, Gulchehra

ot 1. esk. Boʻlib oʻtgan ish, hodisa va shu kabilar yuzasidan yoki haqiqiy ahvolni aniqlash maqsadida oʻtkaziladigan tekshiruv, tergov, soʻroq, reviziya.

Rejali yillik taftish. Taftish komissiyasi.

[Navoiy:] Taftishlar shuni koʻrsatadiki, Yodgorbek qoʻzgʻolonida bu odamning ham qoʻli boʻlgan. Uygʻun va I. — Sulton, Alisher Navoiy

Oʻgʻlingiz sizdan yashirib, Hamza hojining bedin maktabiga qatnarmish deb eshitaman, shu rostmi? — Taftish qildim, taqsir, qatnar ekan. — K. Yashin, Hamza

2. esk. Qidiruv, tintuv.

Oʻgʻrilar tutil-sin, dorga osilsin! Har bir xonadon taftish qilinsin. — J. Sharipov, Xorazm

3. Biror muassasa yoki mansabdor shaxsning moliyaviy-xoʻjalik faoliyatining toʻgʻriligi, qonuniyligini aniqlash maqsadidagi tekshiruv.

Birinchi taftish yuzaki oʻtkazilgani haqida eʼtirozlar tugʻilgach, respublika agrosanoat komitetidan mutaxassis chaqirishdi. — Mushtum

ot Taftish qiluvchi, tekshiruvchi.

Xalq nazorati postidagilar Ilhomchaning egri qoʻlligi haqida militsiyaga signal berishibdi. Ammo taftishchilar kelganda, Ilhomcha allaqachon qochib ulgurgan edi. — H. Gʻulom, Senga intilaman

Pixi qayrilgan taftishchilar qasd qilganda ham, biron marta kamomad topolmaganlar. — Y. Shamsharov, Toshqin

fl. Taftish qilmoq.

fl. Taftishlamoq feʼlining majhul nisbati.

ruschaназначение ревизииinglizchaassignment of audit