Қидирув

от 1. тиб. Касалликдан тил устида пайдо бўладиган оқ қатлам.

Тил караш боғлаб қолган бўлса, яхшилаб артиш зарур. — Н. Исмоилов, Касалларни парвариш қилиш

Касалликнинг бошланишида тил усти қуруқ ва оқ караш бўлади. — Ҳ. Ҳакимов, Ўткир аппендицит

2. кўчма Танадаги кир қатлам.

оёғидаги қават-қават пайтава, қотиб кетган жун пайпоқни ечаётган Меҳринисонинг кўнгли алланечук бўлиб кетди: — Оёқларинг караш бўлиб кетибди. — Р. Файзий, Ҳазрати инсон

от Бировга ёқиш учун гавда, айниқса, юз-кўз билан қилинган нозли ҳаракат; қичиқ.

Карашма қилмоқ.

— Кетай деб ўрнимдан тургандим, — деди Зарифа Шералидан кўз узмай, карашма билан унинг диққатини ўзига жалб этишга тиришиб. — С. Кароматов, Олтин қум

сфт. Ноз-карашма қиладиган; нозли; ноз-карашма билан ижро этилган.

Карашмали қиз. Карашмали ҳаракат.

[ Қиз:] — Мана бу узумни олинг, жуда яхши пишибди, қўлимни қайтарманг! — деди-да, йигитларнинг кўнглини ларзага соладиган шўх, карашмали кулги билан кулди. — Ойбек, Танланган асарлар

фл. Караш пайдо бўлмоқ, караш қопламоқ.

Беморнинг [қорин тифи билан оғриган] тили карашланади. — Газетадан

от Ноз ва карашма; ноз ва ишва(лар).

Тўранинг кўнглига шу пайтда на гўзал ёш хотиннинг таъзими, на унинг ноз-карашмаси ва на безаклари сиғар эди. — Ж. Шарипов, Хоразм

Лаъли ўрнидан туриб, сочларини тузатди. Чироқни пасайтирди-да, ноз-карашма билан Бўлди, ухланг! деди. — Ҳ. Ғулом, Машъал

от айн. Ноз-карашма.