fl. 1. Teriga, badanga tegib yoki tegizib, kulgi qistatmoq.
Bir-birini qitiqlab, hiringlashgan qizlar Nozikning soʻziga quloq solmadilar. — A. Qodiriy, Mehrobdan chayon
2. fiziol. Qoʻzgʻatmoq, uygʻotmoq, taʼsir qilmoq (asabni, organizmni, ayrim aʼzoni).
Nerv uchlarini qitiqlamoq.
Ular [oziq moddalar] yetarli boʻlsa, toʻqlik markazi qitiqlanib, ishtaha boʻgʻiladi, kamayib ketganida esa ochlik markazi qitiqlanib, ishtaha ochiladi. — Fan va turmush
3. koʻchma Bezovta qilmoq, qoʻzgʻatmoq, kuchaytirmoq.
Qovurilayotgan kabob hidi dimogʻni qitiqlaydi. — Y. Muqimov, Qutlugʻ qadam
Bu gaplar kishilarning mudragan ruhlarini qitiqladi — P. Tursun, Oʻqituvchi
Xushboʻy yellar bilan dillar zavqini Qitiqlar orombaxsh, sevikli bahor. — X. Rasul.
4. koʻchma Gʻashini yoki achchigʻini keltirmoq, zardasini qaynatmoq.
Salimxonning kelishmagan tovushi uni qitiqladi va u ham qoʻshila boshladi. — A. Qahhor, Sarob
- Yurakni (yoki dilni, qalbni) qitiqlamoq Kishiga yoqib, shirin his-tuygʻular uygʻotmoq, rohat baxsh etmoq, zavq-shavq bagʻishlamoq. Mashinaning darchasidan kirayotgan oʻynoqi shabada dillarni qitiqladi. — T. Rasulov, Marhamat