Қидирув

от Айрим шахс ёки ижтимоий ҳаётдаги нуқсонларни кулги остида олиб, масхаралаб айтилган (ёзилган) гап, жумла, байт, асар.

Аваз айрим мунофиқ, нодон кимсалар хусусида ҳажв айтди. — С. Сиёев, Ёруғлик

Муқимийни кўрганлар кам бўлса ҳам, лекин уни оғиздан оғизга ўтиб келган дилтортар ғазалларидан, кулдириб ичакузар ҳажвларидан танийдиганлар кўп эди. — М. Исмоилий, Фарғона тонг отгунча.

У деворий газетанинг редколлегия аъзоси эди, прогулчиликка қарши чиқарилаётган шошилинч сон учун уч-тўрт банд ҳажв ёзиб боришни илтимос қилишди. — П. Қодиров, Уч илдиз

сфт. Ҳажв ёʻли билан тасвирланган, ҳажв қилиб ёзилган.

Ҳажвий асар. Ҳажвий шеър.

Элмурод дастлабки пайтларда гапхўр улфатларга газета янгиликлари ва Муштум журналининг ҳажвий мақолаларини ўқиб бериш билан кифояланар эди. — П. Турсун, Ўқитувчи

Орзиқул фермадаги ишни танқид қилиб, ҳажвий қўшиқ айтган, шундан бир оз кейин мудир вазифасидан четлаштирилганди. — О. Ҳусанов, Яхшиларга эргашдим

от Ҳажв қилувчи, ҳажвий асар ёзувчи.

Мавлоно Абдулвоси деган машҳур ҳажвчи-латифачининг сўз ва ҳаракатлари ҳамманинг ичагини узди. — Ойбек, Навоий

Форс-тожик адабиётининг классиги, машҳур ҳажвчи адиб Убайд Зоконийнинг туғилганига 700 йил тўлди. — Газетадан

от Ҳажв билан айтилган, ёзилган шеър ва шу кабилар

Санъаткор, халқ ҳажвиясининг кулги, киноя, пичинг ёʻлларидан фойдаланиб, персонажларнинг жонли нутқини образли халқ тили ёрдамида беради. — ЎТА

от Ҳажвиялар, ҳажвлар, ҳажвий асарлар.

Бобур ҳажвиёти айрим кишилар характеридаги бахиллик, бадфеъллик, ғийбатчилик каби салбий хислатларга ҳам қаратилган. — ЎТА

от Ҳажв, ҳажвий асар ёзиш иши, ижоднинг шундай соҳаси. Азиз Абдураззоқ

Фақат шер ёзиб қолмай, насрий ҳажвчиликда ҳам кучини синамоқда. — Муштум

Мен биргина журналист бўлибгина қолмай, бу қозонда [газетачиликда] шоирлик, ҳажвчилик, ҳикоянависликда ҳам пиша бошладим. — С. Абдулла, Менинг дорилфунуним