sft. 1. Hajm-oʻlchovi odatdagidan ortiq, katta; ulkan.
Buyuk togʻ. Buyuk davlat. Buyuk bino.
Zargarov atrofidagi buyuk sahroni, shu sahrodek cheksiz sukunatni sezar, oʻzining behalovat ruhi shu boʻshliqlarni bus-butun toʻldirib turgandek tuyulardi. — A. Muxtor, Asarlar
Fargʻona kanali oʻz koʻlami bilan buyuk atalmish oʻsha kanallardan oʻn baravar buyukdir. — S. Ahmad, Ufq
Falakka boʻy choʻzgan allaqanday buyuk qasr roʻparadan namoyon boʻlib, Meʼmorning xayolini olib qochdi. — Mirmuhsin, Meʼmor
Ahmad oʻzini buyuk koinot qarshisida zarraning milliarddan bir zarrachasidek his etdi. — F. Musajonov, Himmat
2. Ulugʻvor, yuksak, tengsiz, mislsiz.
Buyuk, yetuk odamlar nihoyatda kamtar, kam-suxan, dilbar-u mehribon boʻlishini bu dono qiz yaxshi bilardi. — Mirmuhsin, Meʼmor
Buyuk voqealar oldida vaqt oʻz hukmini oʻtkaza olmaydi. — Saodat
Insoniyat oʻz kamoloti jarayonida qoʻlga kiritgan buyuk kashfiyoti — tildir. — Gʻ. Salomov, Tarjima nazariyasi
Bahor boʻyi, yoz boʻyi zarrama-zarra yiqqan bunyodini buyuk saxovat bilan dehqon etagiga toʻkayotgan mana shu oltin kuzda uning yuragi qafasdan chiqqan qush yuragiday yayray boshladi. — M. Ismoiliy, Fargʻona tong otguncha
3. Aziz, moʻtabar, muqaddas.
Dunyoda hech soʻz bormi Ona soʻzidan buyuk. — H. Olimjon
Biz birinchi navbatda avlodlarning buyuk xotirasi oldida qarzdormiz. — Gazetadan
4. Buyuk (erkaklar ismi).