Xotinning yaxshi-yomoni mehmon kelganda bilinar

Bir bor ekan, bir yoʻq ekan, bir er-xotin bor ekan. Er ovchilik bilan shugʻullanar ekan. Uning otasi ulardan uzoqroq joyda yashar ekan.

Bir kuni er ovga ketganida birov eshikni taqillatib, «Hazratqul» deb chaqiribdi. Uning xotini eshikni ochmay, ichkaridan turib, «uyda yoʻqlar» deb javob beribdi va kelgan mehmonning kimligini ham soʻramabdi.

Mehmon eshikning ortida turib-turib qaytib ketibdi. U kelgan kishi erining otasi ekan. Ketmasidan avval u kishi shunday debdi:

— Hazratqul kelsa ayting, ostonani boshqa qursin! Eri ovdan qaytgach, xotini:

— Siz yoʻgʻingizda bir kishi keldi. «Eringiz ostonani boshqa qursin» deb ketdi, — debdi.

Shunda eri boʻlgan voqeani tushunib, xotinining javobini berib yuboribdi.

Bir qancha vaqt oʻtgach, Hazratqul yana uylanibdi. U ovdaligida yana otasi kelib, eshikni qoqibdi. Xotini chiqib, uni uyga taklif etibdi, mehmon qilibdi. U xursand boʻlib, qaytayotganida:

— Eringiz kelsa ayting, ostonani sira oʻzgartirmasin, — debdi.