Tabib bilan kasal

Bir kishi kuygan nonni yeb, yurak ogʻrigʻi kasaliga uchrab qolibdi va tabibga borib, kerakli dori soʻrabdi.

Tabib u kishiga koʻz ogʻriganda quyadigan doridan berib, har kuni koʻziga quyib turishni tayinlabdi.

U kishi hayron boʻlib:

— Mening koʻzim emas, yuragim ogʻriyapti-ku, — debdi.

Tabib unga qarab:

— Avval koʻzingga dori quyib olgin. Agar koʻr boʻlmasang, kuygan nonni yermiding? Endi koʻzingni tuzatsang, nonni qarab yeydigan boʻlasan, yurak ogʻrigʻiga ham duchor boʻlmaysan, — debdi.