Sichqonlar tortishuvi

Bir bor ekan, bir yoʻq ekan, ikki sichqon bor ekan. Bu sichqonlardan biri shaharda, ikkinchisi qishloqda yashar ekan.

Kunlardan bir kuni bu sichqonlar bir-birlari bilan tanishib qolibdi. Bundan keyin doʻst boʻlishga ahdlashibdilar.

Birinchi boʻlib qishloqda yashovchi sichqon shaharda yashovchi sichqonni mehmonga chaqiribdi. Sichqon mehmonni bugʻdoy gʻaramlari atrofida aylantiribdi va:

— Men bola-chaqalarim bilan shu joyda, huzur halovatda yashayman, — debdi.

Bir kuni shaharda yashovchi sichqon ham uni mehmonga taklif etibdi. Mehmon kelgach, u xumdagi yogʻlarni koʻrsatib:

— Sen u yerda bugʻdoy bilan kun koʻrayotgan boʻlsang, men bu yerda xumdagi yogʻlarni yalab, bola-chaqalarim bilan farogʻatda yashayapman. Men senga qaraganda yaxshiroq yashayman, — debdi.

Ikki sichqon bir-birlari bilan aytishib, janjallashib qolishibdi. Biri «men yaxshiroq yashayman» desa, boshqasi «yoʻq, men sendan koʻra yaxshiroq yashayman» deb rosa tortishishibdi. Bularning janjalini eshitib qolgan moshvoy sekin kelib, ikkala sichqonni ham yeb qoʻyibdi. Ular hatto qochishga ham ulgurolmay qolishibdi.